Belgili sazger, ánshi Erkesh Shákeev óziniń qaiyrymdylyq kontsertinen túsken qarjyǵa 5 balaly otbasyǵa páter syilady, dep habarlaidy QazAqparat tilshisi.
Qalalyq áleýmettik ál-aýqat basqarmasynan habarlanǵandai, Ainur Mahymova 5 qyz tárbielep otyr. 10 jyl boiy ýaqytsha baspanany panalap kelgen. Kúieýi jumyssyz. Ainurdyń ózi qoǵamdyq jumystarmen ainalysady.
Qyzdardyń úlkeni mektepte oqysa, kishisi balabaqshaǵa barady. Bul otbasy kontsertte syilyq alatynyn bilmegen.
«Bizge habarlasyp, Erkesh Shákeevtiń kontsertine shaqyryp jatqanyn aitty. Dál mundai tosynsyidy kútpedik», - dedi Ainur.
Mýzykant bul muqtaj otbasy týraly áleýmettik jeliden bilgen. Kópbalaly otbasynan shyqqan ánshi qaiyrymdylyq bastamany ózi kótergen. Ol Ainabulaq shaǵyn aýdanynan 82 sharshy metr bolatyn 4 bólmeli páter satyp alyp, keiin ony atalǵan otbasyǵa syiǵa tartty.
Aita keteiik, Shákeevtiń kontsertine Almaty simfoniialyq orkestri, pianist Oliver Poole, Mezzo toby, Marat Bisenǵaliev, A'Studio, Karina Abdýllina, Tolqyn Zabirova, Evrovidenie qatysýshysy Bianca Nicholas qatysty.
