Foto: dimashnews.com
Madridte qazaqstandyq ánshi Dimash Qudaibergenniń jankúierleriniń kezdesýi ótti. Is-sharaǵa Ispaniianyń túkpir-túkpirinen, sondai-aq Germaniia men Shveitsariiadan da jankúierler jinaldy. Bul Dombyra kúnine orai ispan men qazaq mádenietin biriktiretin mańyzdy is-shara boldy, dep habarlaidy "Ult aqparat" Kazinform-ǵa silteme jasap.
Mártebeli qonaqtardyń qatarynda Qazaqstannyń Ispaniiadaǵy elshiliginiń ókilderi, onyń ishinde elshi Danat Musaev, birinshi hatshy Qýanysh Ábpasov, Mádeniet jáne týrizm basqarmasynyń basshysy Raiymbek Toqtaýbaev boldy. Sondai-aq, ispandyq jankúierlerge qazaq tilinen onlain sabaq berip júrgen professor Sandý Toqtaýbaeva da qatysýshylardyń ystyq yqylasyna bólendi.
Foto: dimashnews.com
Dombyra kúnin atap ótý úshin Qazaqstan Elshiligi kontsert uiymdastyryp, onda balalar dástúrli aspapta ár túrli týyndylar oryndady. Alinur men Álihan Amangeldi men Dáýlet Ismailovtar ónerlerin pash etip, qazaq mýzykasynyń rýhyn jetkizip, kórermenderdi ónerlerimen baýrap aldy.
Foto: dimashnews.com
Ispaniiadaǵy qazaq diasporasynyń ókili Gúlnara Gýlcha qonaqtarǵa qazaqtyń ulttyq taǵamdaryn aýyz tigizip jáne ulttyq kiimderimen tanystyrdy.
Foto: dimashnews.com
Sharaǵa Dimashqa arnalǵan týyndylaryn usynǵan fan-art sýretshisi Hose Býson; Baqytty Bala 2023 jeńimpazy Liýsiia Kasani; jáne La Voz Kids 2023 finalisti Jalen Ali syndy arnaiy qonaqtar da qatysty. Jas ánshiler án oryndap, ádemi keshti jandandyrdy. Al, keshtiń sońynda oryndalǵan nómir kórermenderdi erekshe qýanyshqa bóledi.
Dimash Qudaibergen jankúierleriniń Madridtegi kezdesýi tek mýzyka merekesi ǵana emes, mádenietter birliginiń simvolyna ainaldy.
