Sýret: OYU LIVE mýzykalyq arnasy
Ozen leibliniń negizin qalaýshy Aizatýlla Hýssein Tailandta qaitys bolǵan tanymal ánshi Darkhan Juzz-diń shyǵarmashylyǵyna qatysty pikir bildirdi, - dep habarlaidy "Ult aqparat".
"Darkhan Juzz - jańa tolqynnyń alǵashqy ánshileriniń biri. Ol milliondaǵan adamdy qazaq mýzykasyna ǵashyq etip, kóp adam úshin ana tilin úirene bastaýǵa túrtki bolǵan. Onyń ómiri qyrshynynan qiyldy, biraq Darhan kóp nárseni túsinip úlgergen azamat edi. Keiingi kezderi ol shynymen baqytty ómir súrip jatqan.
Juzz-diń albomy aiaqtalmai qaldy. Biz ony mindetti túrde aiaqtap, shyǵaramyz. Barlyq ánniń quqyǵyn uly Adi men qyzy Aidanaǵa mura retinde rásimdeimiz. Ár strimingten túsetin qarjy 100 paiyz otbasyna beriledi. Bizdi Darhannyń murasyn saqtaý jolynda úlken jumystar kútip tur. Onyń ánderi máńgilik shyrqala bersin", - delingen leibldiń Instagram-paraqshasyndaǵy jazbasynda.
Eske salaiyq, 24 aqpanda Darkhan Juzz laqapatymen belgili mýzykant Darhan Júnisbekov qaitys boldy. Sol kúni Syrtqy ister ministrligi ókilderi daryndy jastyń ólimine qatysty túsinik berdi.
"Tailand politsiiasynyń aqparaty boiynsha, 24 aqpanda Phýket aralynda Qazaqstan azamaty Darhan Júnisbekov qaitys boldy. Ol jalǵa alǵan mopedimen jol apatyna túsken. Konsýl marqumnyń týystarymen bailanysta, Qazaqstanǵa máiitti jiberý úshin qajetti qujattardy resimdeý boiynsha jumys júrgizilip jatyr", - dedi SIM resmi ókili Aibek Smadiiarov.
Darkhan Juzz (Darhan Júnisbekov) 1991 jyly 9 tamyzda Almatyda dúniege kelgen. Ol rep oryndaýshy, birqatar ánniń avtory jáne saýnd-prodiýser edi.
