Belgili ánshi Aiqyn Tólepbergen óziniń jary Juldyz Ómirǵalimen úilený toiyn jasady. Birneshe jyl buryn otbasyn qurǵan juldyzdy jup osy ýaqytqa deiin toidy keiinge qaldyryp kelgen. Bul týraly Ulysmedia.kz habarlaidy.
Aiqyn men Juldyz birneshe jyl buryn otaý qurǵanymen, toi jasaý múmkindigi endi ǵana týdy. Aiqynnyń birinshi áielimen ajyrasý protsesi uzaqqa sozylyp, keiin pandemiia jaǵdaiy toidy keiinge shegerýge májbúr etken. Sonymen qatar, olar baspana alý úshin qarajattaryn jinap júrgen. Degenmen, Aiqyn Juldyzǵa aq kóilek kiiýge ýáde bergenin aityp, osy ýádesin oryndaý úshin toidy endi ótkizgen.
«Juldyzǵa úilenemin degende bári maǵan qarsy boldy. Dostarymnan bastap, áke-sheshemnen bastap, oqyrmandarymnan bastap búkil dúniejúzi qarsy boldy. Tek men ǵana qaladym. “Osy Juldyzdy alamyn” dedim. Janym, Juldyz men seni jaqsy kóremin. Ýáde ettim, aq kóilek kiesiń dedim. Men saǵan ákeń de, kúieýiń de, dosyń da, qurbyń da bolamyn», – dedi Aiqyn.
Ánshi sondai-aq anasynyń bastapqyda qarsylyq bildirip, alǵashqy nekedegi balalaryn oilap jylaǵanyn da eske aldy. Toidyń sońynda Aiqyn jarynyń qalaýy boiynsha belgili ánshi Aleksei Chýmakovty sahnaǵa shaqyryp, mikrofon usyndy.
