Qazaqstandyq ánshi Aiqyn Tólepbergenniń Eýropaǵa saiahaty keleńsiz jaǵdailarǵa toly bolǵan. Bul joly Barselonanyń urylary otandasymyzdy tólqujat pen aqshasyz qaldyrdy, dep habarlaidy Sputnik Qazaqstan.
Ánshiniń aitýynsha, bir ǵana Barselona qalasynda jyl saiyn 50-den astam qazaqstandyq týristi tonap ketedi. Urlyq Eýropada órship tur deidi ol.
"Bizdiń sómkemizdi urlap ketti. Riýkzaktyń ishinde aqsha, tólqujat, mashinanyń kilti, uialy telefon – bári bolǵan…. Sondyqtan kóshege shyqqanda, qujattardy qonaq úide, seifte qaldyryńyzdar. Fotosy jetkilikti. Politsiia urlanǵan zattardy izdemeidi de. Sebebi shaǵymdanýshylar óte kóp. Metro, avtobýs, kóshe, tipti saýda ortalyqtarynda da urlaidy. Urylar sizderdiń qastaryńyzda ańdyp júredi. Áńgimemen aldap nemese ústińizge sý shashyp, qaltańyzdy sypyryp ketýi múmkin. Ádemi kiingen qyz nemese jigit te bolýy múmkin. Mashinanyń terezeleri kúnde shaǵylýda. Rezinany aýystyryp jatqanda da, saq bolyńyzdar. Al biz úige qaittyq",- dep jazǵan Aiqyn instagramdaǵy paraqshasynda.
Estrada juldyzy Qazaqstan konsýldyǵyna qujattaryn tez arada qalpyna keltirýge kómekteskeni úshin alǵysyn aitty.
Aita ketsek, buǵan deiin ánshini Barselonada "shortymen" meiramhanaǵa kirgizbegeni habarlanǵan edi. Aldyn ala tólegen 180 eýrosyn da meiramhana ákimshiligi qaitarmai qoiǵan. Sondai-aq, kóligin durys qoimaǵany úshin 100 eýro aiyppul tólepti.
