Angliianyń Joǵary soty Qazaqstan Respýblikasy Ulttyq Bankiniń jáne Qazaqstan Respýblikasynyń Ádilet ministrligi atynan Qazaqstan Respýblikasynyń qatysýymen sot isi boiynsha sheshim shyǵardy, dep habarlaidy QR ulttyq bankiniń baspasóz qyzmeti.
Jaýap berýshi retinde Niý-Iork Banki Mellon (BNYM), Anatol men Gabriel Stati jáne olarmen bailanysty kompaniialar boldy.
Bul Angliianyń Joǵary sotynyń tarihynda Qazaqstan tarapynyń bastamasymen jáne kúsh-jigerimen koronavirýstyń jahandyq pandemiiasyna bailanysty qashyqtan ótken birinshi protsess boldy. Zańgerler, sarapshylar men kýágerler Ulybritaniiada, Qazaqstanda, Belgiiada jáne AQSh-ta bola tura, otyrystarǵa qatysty.
Sot talqylaýy 2018 jylǵy mamyrdan bastap jalǵasyp keledi. Angliianyń Joǵary sotyndaǵy protseske qatysý úshin Ulttyq Bank Stewarts jáne 3 Verulam Buildings siiaqty belgili zań firmalaryn tartty. Sotta isti qaraý barysynda Ulttyq Bank Stati dálelderiniń negizsizdigin jáne kastodian retinde BNYM-de Ulttyq qordyń aktivterine qatysty Ulttyq Bank aldynda ǵana mindettemeleri bar ekendigin dáleldedi.
Bul sheshim Statidiń tórelik sheshimdi Qazaqstan Respýblikasyna qarsy oryndaýǵa ákelý áreketterine bailanysty uzaqqa sozylǵan sot talqylaýlary tizbegindegi mańyzdy bólik bolyp tabylady.
Buryn aǵylshyn soty qolda bar dálelderge súiene otyryp, osy tórelik sheshimdi alý kezinde Stati tarapynan alaiaqtyq belgilerin anyqtady. Osyǵan qaramastan, 2017 jylǵy qazanda Stati Belgiiadaǵy Qazaqstan Respýblikasy Ulttyq qorynyń 22 milliard AQSh dollarynan astam mólsherdegi aktivterine sot tarapynan tyiym salýǵa qol jetkizdi. Ulttyq Banktiń qatysýymen budan bylaiǵy sot talqylaýy barysynda aktivterdiń kóp bóliginen (BNYM kastodiandyq saqtaýdaǵy 530 million dollardy qospaǵanda) tyiym salý alyp tastaldy. Belgiia soty Ulttyq qordyń aktivterin kastodiandyq saqtaýǵa bailanysty ózara qarym-qatynastardyń sipaty týraly máseleni de Angliia sotyna qaita jiberdi.
Angliia Joǵary sotynyń sheshimi Ulttyq qordyń aktivteri tyiym salýǵa jatpaitynyn, sol sebepti, Ulttyq Bank Belgiia sottarynda Qazaqstan Respýblikasy Ulttyq qorynyń aktivterinen tyiym salýdy birjolata aldyrýǵa quqyly ekendigin bildiredi.
