Almatyda múgedek qyzyn it qorlyqta ustap kelgen anaǵa qatysty qylmystyq is qozǵaldy, dep habarlaidy QazAqparat tilshisi.
13 jastaǵy Diananyń jaǵdaiy búkil eldi alańdatyp otyr. Anasy ony 3 jyl boiy dalaǵa shyǵarmai, bailap ustaǵan.
Balany senimhatpen qamqorlyǵyna alǵan Qapshaǵai turǵyny Nadejda Barsýkovanyń aitýynsha, anasy Anna Ivanova 1990 jyldary ózi de balalar úiinen tárbielenip shyqqan eken.
«Ania Ivanovany meniń anam qamqorlyqqa alǵan. Onyń úsh balasy bar. Úlken qyzy 14 jasynda turmysqa shyǵyp ketken, ortanshysy Diana bolsa, kishisi Sofiia qazir anasymen turady. Ania esirtki satqany úshin 2 ret túrmege otyryp shyqqan. Birinshisinde anam aiap, shyǵaryp aldy. Ekinshisinde 5 jyl otyryp shyqty. Sol kezde Diana balalar úiine ótken, al kishi qyzdy týǵan ákesi alyp ketken. Túrmeden shyqqan soń áieldiń Dianany balalar úiinen qaitaryp alǵanyn estidik. Oǵan jataqhanadan bólme kerek bolǵan. Kóp uzamai telearnadan ájesi nemeresin baldaqpen uryp, basyn jarǵany týraly jańalyq estidik. Sol qyz Diana bolatyn», - dedi N.Barsýkova.
Osy jaǵdaidan soń áiel Diananyń jaǵdaiy týraly surastyra bastaidy. «Qyz Reseide oqyp jatyr» degen jeleýmen Ania ony úiine jolatpaidy.
Kúnderdiń kúninde Nadejda Anianyń úiine eskertýsiz barǵan.
«Kirsem, Diana shúberekterdiń ústinde buryshta jatyr eken. Bala basyn burǵanda túrinen shoshyp kettim. Bala jabaiy bolyp ketken. Anasy oǵan terezeden qaraýǵa ruqsat bermegen. Bala 3 jyl boiy dala kórmegen. Birde ony stolǵa bailap ketken eken. Sol sátte bala qarny ashyp, aiaǵyn sheship, tamaq iship alǵan soń qaitadan bailaý jolyn bilmegen. Anasynyń qaharynan qorqyp, qashyp ketýdi oilaidy. Balkonǵa shyǵyp, sekirmek bop turǵanda ainaladaǵy kórshiler politsiia, jedel járdem shaqyryp, aman alyp qalǵan»,- deidi N.Barsýkova.
2017 jyldyń 17 tamyzynda Nadejda Barsýkova Annany kóndirip, qyzdy 3 jylǵa senimhatpen alyp ketken.
Sodan beri jas qyz jańa otbasyna úirenip keledi. Qazir Diananyń áke-sheshesi, eki inisi bar.
«Meniń qyzym paida bolǵaly beri ózimdi shynymen ana sezinip kelemin. Qyzym sát saiyn kelip qushaqtaidy, súiedi. Meni eshkimge bermeshi dep ótinedi», - deidi qamqorlyqqa alǵan anasy.
Diananyń oń jaq qoly men aiaǵynda gemiparez baiqalady. Qulaǵy kesilgen, qol-aiaǵy, murny synǵan. Tisteri túsip qalǵan.
«Qyzym ózi sal aýrýynyń jeńil túrimen aýyrady. Aýzynda qoian jyryq siiaqty aqaýy bar. Bastapqy úsh aida túnimen shyńǵyryp, jylap shyǵatyn. Psihikasy asa aýyr zaqym alǵan edi. Qazir de keide birnársege jumsasań, umytyp qaityp keledi nemese qaida turǵanyn umytyp qalady. Qazir aqyryndap qalpyna kelip jatyr», - deidi N. Barsýkova.
Qazir Nadejda Barsýkova qyzyn asyrap ala almai otyr. Ol úshin aldymen Anna Ivanovany analyq quqyǵynan aiyrý kerek. Nadejda 2017 jyldyń kúzinde politsiiaǵa aryzdanǵan bolatyn. Alaida, tergeý isi bir núkteden qozǵalar emes.
«Ania Ivanova tún ishinde maǵan habarlasyp, aryzymdy alyp ketýimdi ótinip jatyr. Ol úshin balasynan ózim-aq bas tartamyn dep otyr. Biraq men kelispedim. Balany qinap, ómirin qorlaǵan adam jazasyn alýy tiis. Men ony jazalamai qoimaimyn», - dedi Nadejda Barsýkova.
Qalalyq IID baspasóz qyzmetiniń jetekshisi Saltanat Ázirbek atalǵan máslege qatysty túsinikteme berdi.
«Qazir atalǵan derek boiynsha QR QK 114-babynyń, 3-bólimimen is qozǵalyp, sotqa deiingi biryńǵai tergeý reestrine tirkeldi. Birqatar kúrdeli saraptamalar taǵaiyndaldy. Endi anasyn analyq quqyǵynan aiyrý máselesi sot quzyrynda», - dedi Saltanat Ázirbek.
