Nur-Sultan qalasynyń qiyn jaǵdaiǵa tap bolǵan balalardy qoldaý ortalyǵynyń direktory Bibigúl Takisova Iraktan jetkizilgen balalardy beiimdeý jumystary qalai júrgizilip jatqanyn aitty, dep habarlaidy QazAqparat.
«Balalar bastapqyda bul jerge kelgen kezde jylaýyq, qorqaq bolatyn. Qazir balalar birshama beiimdelip qaldy, kóńilderi kóterildi. Olarmen psihologtar, áleýmettik qyzmetkerler, tárbieshiler jumys iste jatyr. Balalardyń jaǵdaiy jaqsy, tuiyq, buiyǵy bolýdan aryldy. Alǵashynda kishkentailary eresekterine jabysyp alatyn. Al qazir tárbieshilerdi qushaqtaidy, súiedi erkin aralasa alady», - dedi ol.
Ortalyq basshysy balalar kúndiz oiynǵa aldanǵanymen túnde uiyqtar aldynda analaryn izdeitindigin aitady.
«Kúndiz oiynnyń qyzyǵyna beriletindikten analaryn izdei qoimaidy. Al túnde analaryn eske alady. Biz olardy jubatyp, analarynyń jaqyn arada keletindigin aityp aldaýsyratamyz», - dedi B.Takisova.
Ortalyq psihology Aibek Qylyshbek te balalardyń alǵash kelgen kezde tuiyq bolǵandyǵyn aitty.
«Eń alǵash kelgendi balalar bir-birimen ajyramaityn. Bólektei bastasań, jylaityn. Al qazir bir-birinen ajyratsań da, ózderin jaily sezinedi. Bastapqy kezde balalar sýret salǵanda kúńgirt tústerdi qoldansa, qazir túrli-túske áýestenip keledi. Bir baiqaǵanym, balalar shatyry joq úiler salatyn. Al bul Irakqa tán dúnie. Qazir «Báiterekti» jáne basqa da túrli-tústi sýretter salady», - dedi ol.
Aita keteiik, búgin QR Bilim jáne ǵylym ministriniń balalar quqyǵy jónindegi keńesshisi Raisa Sher Raisa Sher Nur-Sultan qalasynyń qiyn jaǵdaiǵa tap bolǵan balalardy qoldaý ortalyǵynda Iraktan jetkizilgen balalardyń jai-kúiin BAQ ókilderine tanystyrǵan bolatyn.
