Bul týraly Habar arnasynda ótip jatqan teledebatta QR prezidenttigine kandidat Jigýli Dairabaev aitty, dep habarlaidy BAQ.KZ.
"Aýyldan shyqqan adamdy mensinbeitin halge jettik. Qarapaiym eńbek adamyn qasterleýdi qoidyq. Osynyń barlyǵyn qaita jańǵyrtatyn kez keldi. Men Ata zańymyzdyń basty qaǵidaty - bilik te, bailyq ta halyqqa tiesili bolýyn sóz emes, is júzinde júzege asyramyn. Qarapaiym eńbek adamynyń rólin arttyramyn. Ár adamnyń azamat bolyp qalyptasýyna, tynymsyz eńbek etetin muǵalimderdiń, jan men tánimizdiń saqshysy bolyp júrgen dárigerlerdiń, el yryzdyǵyn molaityp otyrǵan aýyl eńbekshileriniń bedelin bárinen joǵary qoiyp, qaita asqaqtatamyn", - dedi Dairabaev.
Aitýynsha, baǵdarlamasynyń ekinshi taraýy sana-sezimdi jańartyp, árbir azamatty joǵary mádeniettilikke shaqyrýǵa arnalǵan.
"Biz - úlkendi ardaqtap, kishige qamqor bola bilgen elmiz. Jaý men daýdy bir sózben-aq toqtatqan dana halyqpyz. Ár qazaqstandyq besiginen jaqsy tálim alsa, qýlyqpen tapqan bailyqqa, aram aqshaǵa, jastaiynan jiirkenishti qarasa, sonda ǵana ońalamyz. Analardyń kóńili dalada emes, balada bolýy kerek. Sondyqtan olarǵa qolaily jaǵdai jasaýǵa mindettimiz. Tilimiz joǵalsa, ultymyz da joǵalady. Sondyqtan ana tilimizdiń rólin de arttyramyn", - dedi úmitker.
