Ult.kz portaly aiaýly analarymyzdyń merekesine orai óleńder toptamasyn ázirlegen bolatyn. Ana týraly úzdik óleńderdi oqyrman nazaryna usynamyz.
Ana
Besikte – Ana, besikte – bóbek:
Biri terbeledi, biri terbetedi.
Bal-bóbek byldyr, ósip te keledi,
Anaǵa jalǵyz, sol jetedi.
Ana, Ana, qairan, ana!
Terbeidi Ana álemdegi kúlkini,
Nur sebedi analardyń kirpigi ólige de oiaýǵa,
Ana daiyn bireý úshin jylaýǵa, bireý úshin aiaýǵa.
Terbeidi Ana qýanyshty, baqytty, terbeidi
Ana – tebirenedi jany shyn.
Terbeidi Ana ýaqytty; Barlyq álem – bir-aq besik Ana úshin.
Terbeidi Ana bóbegin,
Sol arqyly terbetedi óz elin,
Qumyn, taýyn, ózenin.
Terbeidi Ana kóleńkeni, shýaqty –
Planetanyń alaqany siiaqty...
Jumeken Nájimedenov
Ana
Armanyńdy aqtarmyn ba júregimde terbesem?
Aiǵa sińili, qaryndassyń qasietti Jerge sen.
Men ózińdi teńdesi joq qudiret dep túsinem,
Sendik qýat myń ese artyq Jerdiń tartý kúshinen.
Sulý álem, álem sulý sen jaratqan adammen,
Kók jolynyń qarsylyǵyn qaǵyp tastap baram men.
Sendik qýat bolar, bálkim, basyn idi kók maǵan,
Árkez senen týǵanymdy esime alsam, toqtaman.
Al umytsam, umyt bolyp qalarymdy bilemin,
Umyt qalmaý úshin meniń sharq urady júregim.
Shat júrip-aq qas qaqqansha bolamyn men shermende,
Jetim emes kei ananyń jetimdigin kórgende,
Kóz aldymda jas dóńgelep býlyǵam da yzadan,
Maǵan tipti sóz kelmeitin uiattardan qyzaram.
Bul dúniege onsyz-daǵy ketken joq pa kóp eseń,
O, analar, kei pasyqty jaratasyń nege sen?!
Tasbaýyrlar dúniege kelsin de, tez ketsin de,
Álde ózgeler ondailardan jiirkensin deisiń be?
Qai keýdeni jylytady lapyldaǵan otpenen,
Óz keýdesin jylytýǵa qudireti jetpegen.
Anań saǵan kerek bolsa, balańa da sen kerek,
Kezekpenen aýysatyn ǵumyr ǵoi bul dóńgelek.
Ana kerek, o, adamdar, ana kerek adamǵa,
Anasyzdar ań siiaqty kún keship júr ǵalamda.
Pikirimdi unatpaǵan taptyq ta der danany,
Danalyqtyń qajeti joq syilaý úshin anany!
Tólegen Aibergenov
***
Bári de, Ana,
Bir ózińnen bastaldy.
Sen dep jazdym alǵash óleń dastandy.
Qýandym ba,
Óziń bar dep qýandym.
Jyladym ba,
Óziń joq dep jas tamdy.
Bári de, Ana,
Bir ózińnen bastaldy.
Janaryńnan kórdim alǵash aspandy.
Erkelesem, bir ózińe erkelep,
Jasqandym ba,
Tek ózińnen jasqandym.
Alǵashqy dám, ol da sendik sút edi,
Aq sút bergen qashanda úmit kútedi,
Otanymnyń ózi senen bastalyp.
Jaýlaryma jetken jerden bitedi
Qadyr Myrza Áli
***
Sheshe,
Sen baqyttysyń,
Jylamaǵyn!
Jai túsip jatqanda da qulamadyń.
Táńirińnen men edim ǵoi suraǵanyń
Sondyqtan jylamaǵyn, jylamaǵyn!
Barmyn ǵoi
Tirimin ǵoi,
Qasyńdamyn.
Ólmeimin, men ózińdei asyldanmyn.
Taýsylyp, óz-ózińnen shashylmaǵyn,
Baiyrǵy berekeńdi qashyrmaǵyn.
Men seniń qanyqpyn ǵoi kóz jasyńa
Ózim kepil tot basyp, tozbasyma.
Eki jyr jazsam saǵan birin arnap
«Sheshe» dep jazdym ylǵi sóz basyna.
(Táńirim keshe kórsin kesirimdi)
Aspanǵa jazsam seniń esimińdi!!!
Sheshe,
Sen baqyttysyń, terbete ber
Quba taldan iilgen besigimdi…
Muqaǵali Maqataev
Ana
Qulaiyn dep bara jatam quldyrap,
Kóńilim júdep, kózim aldy buldyrap,
Sol kezde bir án estimin jaqynnan,
Aqqan bulaq sekildengen syldyrap.
Esim jiyp, óz boiymdy tik ustap,
Tirshiliktiń áýenimen tynystap,
Sergimin de, sezim gúlin qulpyrtam,
Kel degendei bolady bir kúmis baq..
Sóndim-aý dep, óldim-aý dep yshqynyp,
Qalǵan kezde boiymdaǵy kúsh buǵyp,
Sónbeisiń dep daýystaidy anashym,
Men ornymnan jyǵylamyn úsh turyp.
Oinap shyǵam sodan keiin quraqtai,
Jarqyldaimyn júregimdi jylatpai,
Múmkin,múmkin ana mahabbaty shyǵar bul,
Meni súiep kele jatqan qulatpai.
Tumanbai Moldaǵaliev
Apama
Ár kúnińe tań bolyp kúle kirem,
Gúliń bolam, baǵyńa myń egilem.
Saǵan alqa syilar em, qaltam tesik,
Móp-móldir ǵyp moinyńa júrek ilem.
Tynyshtyǵyn janymnyń túnge urlatyp,
Jyr jazamyn, bul – azap, bul bir baqyt!
Qiialymnyń shetinen qiyp alyp,
Syrǵa taǵyp beremin syńǵyrlatyp.
Olqy soǵar bir saǵan bu da, sirá,
(Syilyq kútpes ulynan kim asyǵa).
Júzińdegi jyldardyń daǵyn anaý,
Jýyp berem oiymnyń tumasyna.
Shyrqasam dep halqymnyń aiaýly ánin,
Saǵat saiyn, sát saiyn oiaý janym.
Samaiyńnyń aǵyna berem jaǵyp,
Qara túnniń tup-tunyq boiaýlaryn.
Syrqatyńnyń jarasa bir emine,
Sózim meniń, basqasha tilegim ne.
Nury taiǵan kózińe sáýle berip,
Maqtanyshpen qaratam jyr eline.
Odan ózge qoldan joq túk keleri,
(Baitaǵynan bailyqtyń kútpe meni!)
Qazirshe men el kezgen diýanamyn,
Adastyrǵan óleńniń núkteleri...
Tarqamaǵan boiynan dalam sheri,
Jumaq kúnge jetelep baram sony!
Qartaisam da, qairyla, bir erkelep,
Alý úshin, jan Apa, tabam seni!
Murat Shaimaran
