Jyldyń alǵashqy toqsanynda elimizde ana men bala ólimi kúrt azaiǵan. QR Densaýlyq saqtaý ministri Ajar Ǵiniiat muny koronavirýs infektsiiasynyń ekpini qaitqanymen bailanystyryp otyr, dep habarlaidy QazAqparat.
«Koronavirýs infektsiiasynan júkti áielder kóz jumǵan bolatyn. Óitkeni júkti áielderde koronavirýs aýyr ótken edi. Olardyń fiziologiialyq jaǵdaiy da aýrýdyń keń taralyp, jyldam asqynýyna sebep bolǵanyn túsinip otyrsyzdar», - dedi Ajar Ǵiniiat Senat otyrysynan keiin ótken brifingide.
Aitýynsha, pandemiia kezinde ana ólimi álem boiynsha 3-4 ese artqan. Dúniejúzilik densaýlyq saqtaý uiymynyń deregin keltirgen ministr pandemiiaǵa deiin ana ólimi óte az tirkeletin elderdiń ózinde bul kórsetkish 3-4 ese óskenin atady. Iaǵni, jalpy álemde ana óliminiń artýy koronavirýspen bailanysty.
«Bul virýs bolǵandyqtan balasyń ba, jassyń ba, kárisiń be, júkti anasyń ba – qaramady. Jap-jas, deni saý adamdar da kóz jumyp jatty. Al júkti áielderdiń fiziologiialyq jaǵdaiy infektsiianyń tez damýyna yqpal etip, qaiǵyly jaǵdailardyń kóbeiýine sebepshi boldy. Dúniejúzilik densaýlyq saqtaý uiymy júrgizgen barlyq taldaýlar álemde, sonyń ishinde Qazaqstanda da bul kórsetkish byltyr óskenin kórsetedi. Qańtar aiynda koronavirýs infektsiiasynyń besinshi tolqyny bolǵanyna qaramastan, birinshi toqsanda bul kórsetkish kúrt tómendedi. Ana óliminiń ósýi koronavirýs infektsiiasymen bailanysty», - dedi ministr.
Ajar Ǵiniiat biyl birinshi toqsanda Qazaqstanda ana ólimi kúrt azaiǵanyn atap ótti.
«Birinshi toqsanda Atyraý, Pavlodar siiaqty ana óliminiń kórsetkishi joǵary oblystarda qaiǵyly jaittar tirkeldi. Jalpy bul qaiǵyly oqiǵalar bosandyrýǵa qajet jańa nemese qymbat tehnikanyń bolmaýymen bailanysty emes. Ólimniń negizgi sebepteriniń biri halyqtyń densaýlyǵyna jáne perinataldyq ortalyqtarda nemese perzenthanalarda ýaqtyly kómek alýǵa nemquraily qaraitynymen bailanysty.
Jyl saiyn maqsatty transfertter arqyly, respýblikalyq biýdjet arqyly árbir óńirge belgili bir aqsha bólinedi. Biyl meditsinalyq jabdyqtardy satyp alýǵa 50 mlrd teńge josparlanǵan. Onyń ishinde biz bosanatyn áielderge jáne balalar uiymdaryna basymdyq beremiz», - dedi Ajar Ǵiniiat.
Onyń málimetinshe, sońǵy eki jylda perzenthanalar men perinataldyq ortalyqtardyń jabdyqtalýy 80-90%-ǵa jetken.
«Óńirler bul baǵytta jumys istep jatyr. Biraq tehnikanyń aty – tehnika. Táýligine 24 saǵat jumys isteitin apparattar, ýltradybystyq zertteý apparattary jyl saiyn jańartýdy qajet etedi» - dedi ministr.
