Densaýlyq salasynyń ótken jylǵy jumysyn qorytyndylaǵan alqa ótti. Onda 2016–2019 jylǵa arnalǵan «Densaýlyq» memlekettik baǵdarlamasynyń oryndalý barysy talqylandy. Jiynǵa oblystyq, aýdandyq, qalalyq meditsina mekemeleriniń basshylary jáne dárigerler qatysty. Alqaǵa oblys ákiminiń orynbasary Jaqsylyq Omar jetekshilik etti.
Densaýlyq saqtaý basqarmasynyń basshysy Baýyrjan Ysqaq baiandama jasap, atqarylǵan jumystar men saladaǵy kem-ketikterdi sóz etti.
– 2017 jyly oblystyq densaýlyq saqtaý salasyna bólingen qarjy 82,8 mlrd. teńgeni qurady. Onyń 74,7 mlrd. teńgesi respýblikalyq biýdjetten, 8,1 mlrd. teńgesi jergilikti biýdjet qorjynynan bólingen. Ótken jylǵy bólingen qarjy 2016-men salystyrǵanda 14 paiyzǵa artyq, – dedi basqarma basshysy. Meditsina salasyna bólingen qarjy jyl saiyn artyp keledi. Biraq, kemshilikter jeterlik. Sońǵy jyldary ana men bala óliminiń sany artqan.
Oblys ákiminiń orynbasary Jaqsylyq Omar olqylyqqa jol bergen aýdandardyń jaýapty mamandaryn ornynan turǵyzdy. Raiymbek, Qarasai, Balqash, Ile aýdandary synǵa alyndy. Barlyǵy bala ólimine ata-analar ózderi kináli degen jaýap berip, jaltarýǵa tyrysty. Analar júktilik kezinde esepke turmaidy. Durys tekseris júrgizilmegendikten, ishtegi sharananyń densaýlyǵyndaǵy kem-ketikti baiqai almaimyz degendi jeleý etti mamandar. Óz kezeginde sóz alǵan oblystyq densaýlyq saqtaý basqarmasy basshysynyń orynbasary Elmira Ahmetova júktilik kezinde analardy erekshe nazarda ustaý kerektigin aitty.
– Keibireýler densaýlyǵy syr bere bastaǵannan ózinshe em jasaidy. Sonyń bári mamannyń júkti áielge qai kezde, qandai em jasaý kerektigin aitpaǵandyqtan. Jónsiz dári-dármek ishkendikten ishtegi bala kemtar bolyp dúniege keledi. Akýsher-ginekologtardyń ýaqytynda, durys kómek kórsetpegendiginen ana men bala qaiǵyly jaǵdailarǵa dýshar bolyp jatady. Sondyqtan, dárigerlerdiń biliktiligi men jaýapkershiligin arttyrýymyz kerek,– deidi ol.
Taldyqorǵan qalasynda brýtsellez syrqaty kóbeigen. Jaqsylyq Muqashuly bul jóninde jaýap berý úshin qala ákiminiń orynbasary Márlen Kólbaevty ornynan turǵyzdy. Ol eki jaǵdaidyń maldan juqqanyn, qalǵanynyń basqa eldi mekennen kelip dárigerge tekserilgenderden anyqtalǵanyn aitty. Aýdandaǵy ana ólimine bailanysty Jambyl aýdany ákiminiń orynbasary Dastan Shaltabaevtyń atyna syn aityldy.
Jiynda kóptegen tolǵaqty máseleler aityldy. Oblysta 106 dáriger jetispeidi. Sonyń ishinde kóp jerde reanimatolog, neonatolog, ginekolog, pediatrlardyń orny bos. Osy olqylyqtyń ornyn toltyrý barysynda barsha jaýapty mamandar jumys isteýi kerektigi aityldy. Aýdandyq, qalalyq aýrýhanalardyń bas dárigerleriniń mereke kúnderi jumys oryndarynan tabylýlary kerektigi sóz boldy.
– Syrqattar merekeni toilai almaidy, endeshe dárigerler de merekede demalmai jumys isteýi tiis,– dedi salaǵa jaýapty basshy.
Jiynnyń qorytyndysynda bas dárigerlerge investorlar jáne qaiyrymdylyq qorlarymen jumys isteý tapsyryldy. Barlyq meditsina mekemelerin internetpen, ortaq elektrondy júiemen qamtý júkteldi. Memlekettik jáne jekemenshik seriktestik nyǵaitylýy tiis ekendigi aityldy.
Gúljan TURSYN
