Foto: freepik.com
Elimizdegi 102 ushaqtyń beseýiniń qoldanysta bolýy merzimi 25 jyldan asqan. Bul týraly Kólik ministri Marat Qarabaev aitty, dep habarlaidy Ult.kz Kazinform-ǵa silteme jasap.
Májilistegi eldiń kólik-logistikalyq áleýetin damytýǵa arnalǵan Úkimet saǵatynda depýtat Samat Nurtaza ministrden elimizde qansha eski ushaq jolaýshylar tasymaldaitynyn suraǵan edi.
- Jolaýshylardy turaqty tasymaldaýǵa 100-den astam áýe borty jumyldyrylǵanyn aittyńyz. Eger áýe kompaniialarynyń saittaryn qarasaq, ushaqtardyń jasy táýelsizdigimizben birdei, 30 jyldan asyp ketken. Áýe kompaniialaryna zamanaýi ushaqtar alý kerektigin, sanyn arttyrý qajettigin kóp aitamyz. Biraq, tek bilet baǵasy ǵana kóterile beredi. 102 áýe bortynyń qanshaýynda 25 jyldyq merzim ótip ketken? - dedi depýtat.
Ministrdiń atap ótýinshe, 102 ushaqtyń beseýiniń qoldanysta bolýy merzimi 25 jyldan asqan.
- Olar «Iýjnoe nebo» kompaniiasyna tiesili. Onda 5 eski AN-24 ushaqtary bar. Biz olardy ne úshin ustap otyrmyz? Mysaly, Zaisan, Úrjar áýejailary basqa úlgidegi ushaqtardy qabyldai almaidy. Jergilikti halyq ol jaqqa ushaqtardyń qatynaýyn suraidy. Byltyr jabamyz degen edik, halyq suraǵan soń qaldyrdyq. Zaisandy rettegennen keiin bul ushaqtar reisten alynady. Jalpy, ishki naryqta 671 baǵytta reis bolsa, onyń 97 paiyzynda shyǵarylǵanyna 10 jylǵa deiingi ushaqtar qatynaidy. Iaǵni, olardyń qaýipsizdigi tolyǵymen qamtamasyz etilgen, - dedi Marat Qarabaev.
Buǵan deiin Májilis depýtaty Nurtai Sabilianov áýe kóligi salasyndaǵy máselelerdi ataǵanyn jazǵan edik.
