فوتو: freepik.com
ەلٸمٸزدەگٸ 102 ۇشاقتىڭ بەسەۋٸنٸڭ قولدانىستا بولۋى مەرزٸمٸ 25 جىلدان اسقان. بۇل تۋرالى كٶلٸك مينيسترٸ مارات قاراباەۆ ايتتى, دەپ حابارلايدى Ult.kz Kazinform-عا سٸلتەمە جاساپ.
مەجٸلٸستەگٸ ەلدٸڭ كٶلٸك-لوگيستيكالىق ەلەۋەتٸن دامىتۋعا ارنالعان ٷكٸمەت ساعاتىندا دەپۋتات سامات نۇرتازا مينيستردەن ەلٸمٸزدە قانشا ەسكٸ ۇشاق جولاۋشىلار تاسىمالدايتىنىن سۇراعان ەدٸ.
- جولاۋشىلاردى تۇراقتى تاسىمالداۋعا 100-دەن استام ەۋە بورتى جۇمىلدىرىلعانىن ايتتىڭىز. ەگەر ەۋە كومپانييالارىنىڭ سايتتارىن قاراساق, ۇشاقتاردىڭ جاسى تەۋەلسٸزدٸگٸمٸزبەن بٸردەي, 30 جىلدان اسىپ كەتكەن. ەۋە كومپانييالارىنا زاماناۋي ۇشاقتار الۋ كەرەكتٸگٸن, سانىن ارتتىرۋ قاجەتتٸگٸن كٶپ ايتامىز. بٸراق, تەك بيلەت باعاسى عانا كٶتەرٸلە بەرەدٸ. 102 ەۋە بورتىنىڭ قانشاۋىندا 25 جىلدىق مەرزٸم ٶتٸپ كەتكەن? - دەدٸ دەپۋتات.
مينيستردٸڭ اتاپ ٶتۋٸنشە, 102 ۇشاقتىڭ بەسەۋٸنٸڭ قولدانىستا بولۋى مەرزٸمٸ 25 جىلدان اسقان.
- ولار «يۋجنوە نەبو» كومپانيياسىنا تيەسٸلٸ. وندا 5 ەسكٸ ان-24 ۇشاقتارى بار. بٸز ولاردى نە ٷشٸن ۇستاپ وتىرمىز? مىسالى, زايسان, ٷرجار ەۋەجايلارى باسقا ٷلگٸدەگٸ ۇشاقتاردى قابىلداي المايدى. جەرگٸلٸكتٸ حالىق ول جاققا ۇشاقتاردىڭ قاتىناۋىن سۇرايدى. بىلتىر جابامىز دەگەن ەدٸك, حالىق سۇراعان سوڭ قالدىردىق. زايساندى رەتتەگەننەن كەيٸن بۇل ۇشاقتار رەيستەن الىنادى. جالپى, ٸشكٸ نارىقتا 671 باعىتتا رەيس بولسا, ونىڭ 97 پايىزىندا شىعارىلعانىنا 10 جىلعا دەيٸنگٸ ۇشاقتار قاتىنايدى. ياعني, ولاردىڭ قاۋٸپسٸزدٸگٸ تولىعىمەن قامتاماسىز ەتٸلگەن, - دەدٸ مارات قاراباەۆ.
بۇعان دەيٸن مەجٸلٸس دەپۋتاتى نۇرتاي سابيليانوۆ ەۋە كٶلٸگٸ سالاسىنداعى مەسەلەلەردٸ اتاعانىن جازعان ەدٸك.
