Dárigerler Aqmola oblysynda apatqa ushyraǵan AN-2 ushaǵynyń eki ekipaj múshesiniń janyn aman alyp qalý úshin kúresip jatyr. Bul týraly Nur-Sultan qalalyq Qoǵamdyq densaýlyq saqtaý basqarmasy statsionardy uiymdastyrý bóliminiń bas mamany Jeleýhan Pirimqulov aitty, dep habarlaidy QazAqparat tilshisi.
"20 maýsym kúni Nur-Sultan qalasynan 60 shaqyrym jerde, Rodina eldi mekeniniń janynda AN-2 ushaǵy apatqa ushyrady. Ushaq ekipajynyń eki múshesi elorda aýrýhanalaryna jedel járdem kólikterimen jetkizildi. Birinshi naýqas 1990 jylǵy, óte aýyr jaraqatpen - "bas miynyń ashyq jaraqaty, bas súieginiń basyńqy synýy jáne bas miynyń shaiqalýy" diagnozymen Nur-Sultan qalasynyń Ortalyq temir jol aýrýhanasyna jetkizildi. Qazir naýqas jansaqtaý bóliminde em alyp jatyr. Aýrýhananyń barlyq dárigeri naýqastyń ómiri úshin kúresýde. Naýqas shoktan shyqqan jaǵdaida bas miynyń basyńqy synyǵyna ota jasalady. Ota búgin jasalyp qalýy múmkin", - dedi ol.
Onyń atap ótýinshe, 1992 jyly dúniege kelgen ekinshi naýqas ta jedel járdem kóligimen Nur-Sultan qalalyq Travmatologiia jáne ortopediia ǵylymi-zertteý institýtyna jetkizildi.
"Naýqasqa «jabyq mi jaraqaty, midyń shaiqalýy jáne bas-mi súieginiń jaraqaty» diagnozy qoiylǵan. Bul naýqastyń jaǵdaiy aýyr. Qazirgi ýaqytta jansaqtaý bóliminde jatyr. Ǵylymi-zertteý institýtynyń barlyq dárigerleri naýqastyń janyn aman alyp qalý úshin kúresýde. Dál osy sátte bul naýqasqa ota jasaýdyń qajeti joq", - dedi J.Pirimqulov.
Eske sala keteiik, búgin Aqmola oblysynda AN-2 ushaǵy apatqa ushyrady. Saldarynan ushqysh kóz jumyp, ekipajdyń eki múshesi túrli jaraqatpen aýrhanaǵa jetkizildi. Oqiǵaǵa bailanysty qylmystyq is qozǵaldy.
