«Ýkraina-Aeroalians» áýe kompaniiasynyń An-12 ushaǵy Lvov áýejaiynyń mańynda apatty jaǵdaida qondy. Saldarynan 5 adam kóz jumdy. Bul jóninde Facebook jelisinde Infraqurylym ministri Vladislav Kriklii málim etti, dep habarlaidy "Ult aqparat" Ýkrinformǵa silteme jasap.
«Aldyn ala málimetterge sáikes, Ýkraina-Aeroalians áýe kompaniiasynyń An-12 #UR-CAH ushaǵy Viko (Ispaniia) – Lvov baǵyty boiynsha #UKL4050 charterlik júk reisin oryndaý kezinde aerodrom janyndaǵy Sokolniki aýylyna apatty jaǵdaida qonǵan. Bortta 7 ekipaj múshesi men júkke ilesip júrgen 1 adam boldy. Saldarynan 3 adam kóz jumyp, 3 adam aýyr jaraqattandy, taǵy ekeýi izdestirilý ústinde. Qutqarý operatsiiasy jalǵasyp jatyr», - dep jazdy Kriklii.
Artynan ministr 5 adamnyń kóz jumǵanyn málim etti.
Sondai-aq, ol ushaqtyń apatty jaǵdaida qonýyna janarmaidyń taýsylýy sebep bolǵanyn atady. Tergeý jalǵasýda.
Ministr qaza tapqandardyń týǵan-týystaryna qaiǵyra kóńil aitty.
Ýkrainanyń Tótenshe jaǵdailar jónindegi memlekettik qyzmetinen málim etkendei, 4 qazan kúni tańerteń radardan joǵalyp ketip, ushyp-qoný jolaǵynan 1,5 shaqyrym jerden tabylǵan An-12 ushaǵy «Lvov» áýejaiynyń mańyna apatty jaǵdaida qonýǵa májbúr bolǵan.
«4 qazan kúni saǵat 07:10-da «Lvov» halyqaralyq áýejaiynan 13,7 shaqyrym qashyqtyqta An-12 ushaǵy radardan joǵalyp ketkeni týraly habar kelip tústi. Saǵat 07:29-da ekipajdyń bir múshesi bailanysqa shyǵyp, An-12 ushaǵy apatty jaǵdaida qonǵany týraly málim etti. 07:46-da An-12 ushaǵy ushyp-qoný jolaǵynan 1,5 shaqyrym jerde tabyldy», - delingen habarlamada.
Ushaq órtenbegen. Ekipajdy zaqymdalǵan ushaqtan shyǵarý jumystaryna Tótenshe jaǵdailar jónindegi memlekettik qyzmetten 41 adam men 7 tehnika jumyldyryldy.
