Búgin «Ult taǵdyry» qoǵamdyq birlestiginiń atynan prezidenttikke kandidat Ámirjan Qosanov Soltústik Qazaqstan oblysy, Maǵjan Jumabaev aýdany Býlaevo qalasynyń ortalyq kitaphanasynda sailaýshylarmen kezdesti.
Shtab ókilderi batyr Baian men Maǵjan Jumabaevtyń eskertkishine bardy. Turǵyndarmen kezdesýde kandidat óziniń sailaýaldy tuǵyrnamasynyń basym baǵyttarymen tanystyrdy. Sondai-aq ol soltústik óńir turǵyndarynyń saýaldaryna jaýap berdi.
Kezdesý týraly kandidat Ámirjan Qosanov: «Sailaý naýqany alǵashqy kúniniń alǵashqy kezdesýin uly aqyn Maǵjan Jumabavtyń týǵan jerinde ótkizdim. Meniń baǵdarlamamda Alash Orda ideiasyn memlekettik ideianyń ustyny etý týraly bap bar. Maǵjan aqyn Alash Orda úkimetiniń kósemderiniń biri bolǵan. Basty simvolizm sonda! Onyń ústine saiasatkerler kóbinese ortalyqtaǵy qalalarmen shektelip jatady. Aýylǵa da baryp turý kerek! Ár kezdesýdiń óz orny bar. Myna kezdesý Reseimen jaqyn ornalasqan, basqa ult ókilderi barshylyq qalada ótti. Sondyqtan orys tiline de júginip otyrýǵa týra keldi. Ár kezdesýden video jiberip otyrý paryz emes shyǵar. Óitkeni baǵdarlama týraly áńgime qaitalanyp otyrýy múmkin. Sondyqtan osy messedjimdi barsha Qazaqstanǵa, onyń úlkendi-kishili qalalary men shalǵaidaǵy aýylyna arnalǵan habar dep bilersizder», dep jazdy jelidegi óz paraqshasynda.
Aita ketsek, úmitkerdiń SQO óńirindegi taǵy bir kezdesýi erteń, iaǵni 13 mamyr kúni saǵat 10-30-da Qyzyljar aýdany Báiterek aýylynda ótedi dep josparlanǵan.
