«Ult taǵdyry» respýblikalyq qoǵamdyq birlestigi atynan QR Prezidenttigine úmitker Ámirjan Qosanov Ortalyq sailaý komissiiasyna qujattaryn tapsyrdy.
«Meniń memlekettik qyzmette 7 jyldyq tájiribem bar. Psihikalyq aýrýlarǵa qatysty anyqtamany aldym. Barlyq qajetti qujatty jinap tapsyrdyq. Olar eki kún qarastyrylatyny aityldy. Dúisenbi kúni saǵat 11-de memlekettik tildi meńgerý synaǵynan ótemin», - dedi Ámirjan Qosanov Ortalyq sailaý komissiiasynda jýrnalisterge bergen suhbatynda.
Aita keteiik keshe «Ult taǵdyry» RQB quryltaiynda saiasatker Ámirjan Qosanovtyń kandidatýrasyn prezidenttik sailaýǵa usyný sheshimi qabyldandy.
Ámirjan Qosanov 1964 jyly 13 mamyrda dúniege kelgen. S. Kirov atyndaǵy Qazaq memlekettik ýniversitetiniń jýrnalistika fakýltetinde bilim alǵan. Túrli jyldary kommýnistik jastar odaǵynda, QR memlekettik organdarynda, saiasi partiialar men qoǵamdyq qozǵalystarda eńbek etken. Úilengen, úsh balasy bar.
Qazirge deiin saiasi partiialar men qoǵamdyq birlestikterden usynylǵan kandidattar:
- Sádibek Túgel - "Uly dala qyrandary" respýblikalyq qozǵalysy (til emtihanynan ótti);
- Qasym-Jomart Toqaev - "Nur Otan" partiiasy (til emtihanynan ótti);
- Amangeldi Taspihov - Qazaqstan kásipodaqtar federatsiiasy (OSK-ǵa qujattaryn tapsyrdy);
- Daniia Espaeva - "Aq jol" partiiasy;
- Tóleýtai Raqymbekov - "Aýyl" partiiasy;
- Jambyl Ahmetbekov - Qazaqstan kommýnistik halyq partiiasy.
Jalpyulttyq sotsial-demokratiialyq partiiasy sailaýǵa qatysýdan bas tartty.
