Qazaqstan Prezidentiniń Halyqaralyq yntymaqtastyq boiynsha Arnaiy ókili Erjan Qazyhannyń Amerika Qurama Shtattaryna jumys sapary ótti. Bul týraly SIM habarlady.
Aq úidiń, Memlekettik departamenttiń jáne AQSh Kongressiniń basshylyǵymen kezdesýler barysynda eki jaqty kún tártibindegi kóptegen máseleler, sonyń ishinde Keńeitilgen strategiialyq seriktestik, saýda-ekonomikalyq jáne investitsiialyq yntymaqtastyqty tereńdetý perspektivalary, jahandyq qaýipsizdik salasy, sondai-aq «S5+1» dialogy sheńberinde aimaqtyq yntymaqtastyqty nyǵaitý talqylandy.
Amerikalyq tarap Memleket basshysy júrgizip jatqan saiasi reformalardy joǵary baǵalady jáne olardy júzege asyrýdy qoldaýǵa daiyn ekenin bildirdi. Qoldanystaǵy mehanizmder sheńberinde Qazaqstan men AQSh arasyndaǵy Keńeitilgen strategiialyq seriktestikti tereńdetý týraly ýaǵdalastyqqa qol jetkizildi.
Sondai-aq, taraptar eki el arasyndaǵy diplomatiialyq qatynastar ornatylýynyń 30 jyldyǵyna arnalǵan is-sharalardy talqylady.
