Qorǵanys ministri general-leitenant Nurlan Ermekbaev Arys qalasyndaǵy jarylmaǵan oq-dárilerdi jinaqtaý (joiý) jumystaryn baǵalap, keńes bergen amerikalyq sarapshylardy, sondai-aq, Qazaqstan Respýblikasyndaǵy Amerika Qurama Shtattarynyń áskeri attashesi polkovnik Bill Sabany qabyldady, dep habarlaidy QR QM baspasóz qyzmeti.
General-leitenant Nurlan Ermekbaev áskeri attashege amerikalyq sarapshylar júrgizgen tiimdi jumysyna alǵysyn bildirdi.
Qorǵanys vedomstvosynyń basshysy Arystaǵy órt saldaryn joiý jumystary jalǵasyp jatqanyn málimdedi. Qorǵanys ministrligi úshin bul mańyzdy másele.
2021 jyldyń 27 sáýiri men 14 mamyry aralyǵynda oq-dárilerdi tazartýǵa jedel den qoiý jasaǵynyń mamandary Mark Tobaias jáne Gregori Ford tehnikalyq aimaqty oq-dári qaldyqtarynan tazartý boiynsha júrgizilgen jáne aldaǵy atqarylatyn jumystarmen tanysty. Olar metall synyqtaryn suryptaityn jerdi aralap, oq-dári qaldyqtaryn joiý jumystarynyń júieliligin zerdeledi.
Minasyzdandyrý jáne EOD (Explosive Ordnance Disposal) salasyndaǵy sarapshylar jarylmaǵan oq-dárilerdi jinaý men olardy joiýdaǵy saperlerdiń jumysyn joǵary baǵalady.
20 jyldan astam álemniń túrli elderinde qyzmet etken Amerikalyq mamandar jumystarynda Arys qalasyndaǵy jaǵdaidy, jarylǵysh zattarmen joǵary deńgeide uiymdastyrylǵan jumysty jáne onyń sapasyn, ádistemesin esh jerde kezdestirmegenin atap ótti. Olardyń aitýynsha, qoima aýmaǵyn jarylý qaýpi bar zattardan tazartý jumystary durys, retimen jáne barynsha qaýipsiz júrgiziledi.
Mark Tobaias jáne Gregori Ford órtenbegen jarylǵyshtar men olardyń qaldyqtarynyń ushýyn múlde boldyrmaityn arnaiy jabdyqtalǵan orynǵa nazar aýdardy.
Amerikalyq mamandar sondai-aq, qazaqstandyq áskeri qyzmetshilerimen aýmaqty jáne qoimalardy tazartý, oq-dárilerdi zalalsyzdandyrý men joiý jóninde keńes berý-ádistemelik jiynyn ótkizdi.
Atalmysh sabaqtar Minaǵa qarsy qyzmettiń halyqaralyq standarttaryna (IMAS) sai júrgizilgenin atap ótken jón.
