Tanymal ánshi Dimash Qudaibergen amerikalyq MTV arnasyna suhbat berdi. Suhbattyń videosy ánshiniń áleýmettik jelidegi paraqshasynda jariialandy, dep habarlaidy "Ult aqparat".
Telearna júrgizýshisi Kevin Kenni Dimashtan Qytaida ne unaǵanyn surady.
«Qytaiǵa kelgennen bastap bári unady. Qytai halqy kópshil, Qytai aýditoriiasy da óte jaqsy. Meniń Qytaidaǵy menedjerlerim óte eńbekqor», - dedi Dimash suhbat barysynda.
Sonymen qatar, júrgizýshi Dimashtan kimmen birge jumys istegisi keletinin jáne Djekson Vang týraly ne oilaitynyn surady.
«Men Selin Dionmen birge jumys istegim keledi. Djekson Vang ta - óte talantty oryndaýshy. Biz sóilesip turamyz, keide kollaboratsiia týraly sóilesemiz. Ol óte talantty», - deidi Dimash.
Taǵy bir suraq Dimashtyń ispan tilinde án aitýy jóninde boldy, ánshi ispan tilide án aitýǵa qarsy emestigin bildirdi.
Kórermenderdiń «Ne nársege maqtanasyz?» degen suraǵyna Dimash «Bárinen buryn qazaq ekenime maqtanamyn» dep jaýap berdi.
Sondai-aq, ánshi óz josparyn ashyp aita bermeitinin jáne biraz ýaqyt AQSh-ta turǵysy keletinin jetkizdi.
«Men óz mýzykamdy ilgeriletý úshin biraq ýaqyt Amerikada turýdy josparlap otyrmyn, óitkeni shoý-biznestiń epitsentrinde bolýym kerek. Buryn da osyǵan uqsas tájiribe boldy, Qytaida 3,5 jyl mýzykamen shuǵyldandym. Alaida, meniń otbasym bolatyn jer árqashan súiikti jerim bolyp qala beredi», - deidi Dimash.
«Ómirdiń óte qysqa ekenin aitqym keledi. Sol úshin bir-birimizge meiirimdi bolyp, jaqsy kórýimiz kerek. Álem saiasatqa toly. Keibir saiasatkerler soǵys bastaýdan da qoryqpaidy», - dep pikir bildirdi Dimash Qudaibergen.
