AQSh-tyń federaldy jáne áskeri nysandarynda memlekettik tý tómen túsiriletin bolady. Koronavirýstan qaitys bolǵandarǵa qurmet bildirý maqsatyn tutqan shara 5 kúnge jalǵasady. Mundai tapsyrmany el Prezidenti Djo Baiden berdi, dep habarlaidy «Amerika daýysy» agenttigi.
22 aqpan kúni keshke Djo Baiden koronavirýs indetinen kóz jumǵan Amerikanyń 500 myń halqyn 1 minýt únsizdikpen eske alyp, otandastaryn áldebir túsinispeýshilikterdi keiinge qaldyryp, pandemiiamen birlesip kúresýge shaqyrdy.
«Búgin bizde óte qaraly, janǵa batarlyq kezeń – 500 071 adam qaitys boldy. Pandemiianyń bir jylynda ajal qushqan amerikalyqtar sany Birinshi dúniejúzilik soǵysty, Ekinshi dúniejúzilik soǵysty jáne Vetnam soǵysyn qosa alǵandaǵy sanǵa qaraǵanda – kóp», - dedi ol.
Prezident sóz sóilegennen keiin vitse-prezident Kamala Haris, birinshi hanym Djill Baiden jáne ekinshi djentlmen Dag Emhoff Aqúide bir minýt únsizdikte boldy. Aqúidiń baspasóz hatshysy Djen Psakidiń málimetinshe, AQSh basshysy aldaǵy 5 kúnde federaldy jáne áskeri nysandarda memlekettik tý túsirilgen kúii turýyn tapsyrdy. Djo Baiden amerikalyqtardy pandemiiamen kúreste qyraǵy bolýǵa, maska taǵýǵa, áleýmettik qashyqtyqty saqtaýǵa jáne óziniń kezegi jetkende vaktsina saldyrýǵa úndedi.
Aita keteiik, álemde koronavirýstan bolǵan ólim-jitim sanynyń 19 paiyzǵa jýyǵy Amerika qurama Shtattaryna tiesili.
