30-31 qazan kúnderi ÁMEN animatsiialyq filmder kinofestivali onlain formatta ótedi, dep habarlaidy "Ult aqparat".
Ótken jyly festival qorjynyna 80-nen astam ótinim túsip, baiqaýǵa 51 jumys iriktep alynǵan edi. Nátijesinde 7 jeńimpaz anyqtalyp, 5 joba arnaiy júldemen marapattaldy.
«Biylǵy ekinshi festival onlain formatta ótedi. Bul baiqaýdyń ereksheligi – óner dodasynyń halyqaralyq deńgeige kóterilýi, sharaǵa túrki elderiniń, atap aitqanda, Túrkiia, Ázerbaijan, Túrikmenstan, Ózbekstan, Qyrǵyzstan, Tatarstan jáne Bashqurtstan ókilderi de qatysady. Bul joly festivalge 40-tan asa jumys usynyldy», - deidi uiymdastyrýshylar.
Baiqaýda 2019-2020 jyldary túsirilgen animatsiialyq filmder, stýdenttik animatsiialyq jumystar jáne komikster synǵa túsedi. Oǵan ótinim bildirgen barlyq sýretshi-mýltiplikatorlar qatysa alady.
Shara aiasynda «Rýhani jańǵyrý» qazaqstandyq qoǵamdyq damý institýtynyń qatysýymen «Qazaq animatsiiasynyń kókeikesti máseleleri» jáne «Túrkitildes elderdiń animatsiialyq kinoóneriniń búgini men erteńi» taqyrybynda dóńgelek ústelder jáne «Qazaqstan: tabiǵat jáne adam» atty komikster kórmesi uiymdastyrylady. Sondai-aq, Ulttyq kinony qoldaý memlekettik ortalyǵynyń atsalysýymen otandyq jáne sheteldik ozyq mýltiplikatorlardyń master-klastary men treningteri ótedi.
Aita keterligi, Ulttyq kinony qoldaý ortalyǵy – Qazaqstanda zamanaýi kinonaryq qalyptastyryp, onyń básekege qabilettiligin arttyrýmen, kino salasyna investitsiia tartýmen jáne ulttyq filmderdiń kinoprokaty qyzmetin júzege asyrýmen ainalysatyn birden-bir uiym.
Budan bólek, «Qazaqfilm» kinostýdiiasynyń qoldaýymen qazaq animatsiialyq filmderi retrospektivasy, iaǵni 1960-2020 jyldar aralyǵynda jaryq kórgen «Qarlyǵashtyń quiryǵy nege aiyr?», «Qańbaq shal», «Joshy han», «Tolaǵai», «Muzbalaq» syndy 30-dan asa mýltfilm kórsetiledi.
Shara barysynda Qazaqstan jáne Túrkiia memleketteriniń tolyqmetrli filmderi de kórsetiledi. Airyqsha atap óterligi, rejisser Qasiet Saqiollanyń «Mahambet» mýltfilmi tuńǵysh ret halyqaralyq deńgeide kópshilik nazaryna usynylmaq.
Kinofestival Youtube jáne Facebook jelisindegi resmi paraqshalarda kórsetiledi.
Kinofestival uiymdastyrýshylary – «OzgeEpic» zamanaýi óner keńistigi men Qazaqstan animatsiialyq kinostýdiialar qaýymdastyǵy.
