Almaty oblysynyń ákimi Amandyq Batalov koronavirýs infektsiiasynyń taralýyna bailanysty Almaty oblysy aýmaǵyndaǵy shekteý sharalary týraly brifing ótkizdi, dep habarlaidy "Ult aqparat"aimaq basshysynyń baspasóz qyzmetine silteme jasap.
Amandyq Batalovtyń aitýynsha, elde TJ rejimi bastalǵannan beri oblysta arnaiy shtab quryldy, qabyldanǵan jedel sharalardyń arqasynda Qarasai aýdanynyń «Asyl Arman» turǵyn úi kesheninde, Eńbekshiqazaq aýdany Shelek aýylyndaǵy saiajai massivterinde koronavirýstyń taralý oshaǵyn erte kezeńnen oqshaýlap, óshirýge múmkindik berdi:
- Qazirgi kezde oblys boiynsha 31 oshaqta karantin alynyp tastaldy. COVID-19 infektsiiasy taralýynyń jańa derekteri tirkelgen óńirlerdi qospaǵanda, karantin sharalaryn kezeń-kezeńimen bosańsytý jumystary bastaldy. Koronavirýsty juqtyrýdyń jańa derekteri tirkelgen óńirlerdi atap ótsek, olar: Talǵar aýdany - 21 jaǵdai, Kegen aýdany – 48 jáne Taldyqorǵan qalasy – 53 jaǵdai. Oblysta qazirgi kezeńde koronavirýstyń 305 jaǵdaiy tirkelgen, 1415 adam meditsina mamandarynyń baqylaýynda. Osyǵan bailanysty áleýmettik qashyqtyqty saqtaý, betperde rejimin saqtaý, jalpy qajetti dezinfektsiialyq-epidemiologiialyq sharalardy saqtaý asa mańyzdy. Bul koronavirýspen kúres jaǵdaiyn tezirek eńserýge kómektesedi. Sol sebepten osy óńirlerde ázirge sanitarlyq blok-posttar alynǵan joq, al oblystyń basqa aimaqtarynda blok-posttardy alyp tastap jatyrmyz. Sol siiaqty Almaty qalasymen shekarada, oblysqa kirip-shyǵatyn jerlerde sanitarlyq blok-posttar alynǵan joq, - dedi A.Batalov.
Sol siiaqty oblys ákimi indetpen kúres sharalaryna óńirdiń metsenattary men biznesmenderi de qoldaý kórsetip jatqanyn aitty. Spiker aýyl sharýashylyǵyndaǵy jumystardyń barysyna da toqtalyp ótti:
- Qabyldanǵan profilaktikalyq jáne sanitarlyq-epidemiologiialyq sharalardyń arqasynda kóktemgi egis jumystary der kezinde bastalyp, kidirissiz júrgizildi. Ónerkásip oryndary tabysty jumys isteýde, olardyń jumysy toqtaǵan joq. Bul sharalardyń óńirde ekonomikalyq jaǵdaidyń turaqtylyǵyn saqtaýdaǵy mańyzy zor.
Indet jaǵdaiynda ózekti bolyp otyrǵan ishki týrizm máselesi de aityldy.
Amandyq Batalov Alakól kóliniń eki jaq jaǵalaýynda da sýǵa túsý merzimin bir merzimde ashý týraly Shyǵys Qazaqstan oblysynyń ákimi Daniial Ahmetovpen ózara aýyzsha kelisimderi bar ekenin, shamamen 13 maýsymda barlyq týristik nysandarda tiisti sanitarlyq-dezinfektsiialyq talaptardy saqtai otyryp jańa maýsym ashylatynyn jetkizdi.
Brifing suraq-jaýappen jalǵasty. Oblys ákimine jýrnalister men blogerler 20-dan astam saýal qoidy. Jýrnalisterdi «Jumyspen qamtý jol kartasynyń» júzege asyrylýy, shaǵyn jáne orta biznesti qoldaý, kommýnaldyq tólemderge ótemaqy tóleý, áleýmettik mańyzdaǵy azyq-túlik taýarlarynyń baǵasyn baqylaý máseleleri qyzyqtyrdy.
Jýrnalisterdiń saýaldaryna jaýap bere otyryp, oblys ákimi jalpy epidemiologiialyq jaǵdai áli de kúrdeli ekenin, soǵan bailanysty balabaqshalardyń ázirge ashylmaitynyn tilge tiek etti. Degenmen balalardyń jazǵy demalys oryndary karantin alynyp tastalǵan ýaqytta óz qyzmetterin sapaly kórsetýge daiyn bolýy úshin, jóndeý jáne daiyndyq jumystaryn júrgizýde.
Baspasóz máslihatynyń sońynda Amandyq Batalov oblys turǵyndaryn karantin sharalaryn qatań saqtaýǵa shaqyrdy:
- Epidemiologiialyq jaǵdaidyń ýshyǵýyna jol bermeý úshin oblys turǵyndaryna aitarym – saqtyq sharalaryn, sanitarlyq-epidemiologiialyq sharalardy saqtap júreiik, ol óz densaýlyǵymyz úshin, jaqyndarymyzdyń densaýlyǵy úshin, azamattardyń saýlyǵy úshin kerek, sonda ǵana biz birlesip qaýipti virýsty jeńip shyǵamyz, - dedi A. Batalov.
