Búgin «Nur Otan» partiiasynyń qoǵamdyq qabyldaýynda Almaty oblysynyń ákimi, «Nur Otan» partiiasy oblystyq filialynyń tóraǵasy Amandyq Batalov azamattardy qabyldady. Óńir basshysyna ózderiniń jeke máselelerimen jáne túrli áleýmettik máselelermen 12 azamat júgindi.
Oblys ákimi Ile aýdanynyń «Avtomobilist» saiajai birlestiginiń turǵyny kótergen birneshe máseleni erekshe nazarǵa aldy. Sonyń ishinde kósheni jaryqtandyrý, balalardy mektepke tasityn avtobýstyń tozǵandyǵy, sol siiaqty Almaty trassasyna shyǵatyn jáne kiretin tikelei jol salyp berý jaiy kóterildi. Amandyq Batalov óziniń birinshi orynbasary Lazzat Turlashovtyń jetekshiligimen arnaiy jumys tobynyń atalǵan eldi mekenge baryp kórip, turǵyndar kótergen máselelerdi sheshý týraly usynystar daiyndaýyn tapsyrdy.
- Ózderińiz bilesizder, biz qazir Taldyqorǵan qalasynyń mańyndaǵy saiajailar men qala mańyndaǵy aýmaqtarǵa kóp kóńil bólip kelemiz. Joldaryn jóndep jatyrmyz, kóshelerine jaryq ornatyp, ortalyqtandyrylǵan aýyz sýǵa qosý máselelerin sheshe bastadyq, tipti gaz tartyp qoidyq. Osylaisha sizder turatyn saiajaidyń infraqurylymy máselesin de birte-birte sheshemiz. Birinshi kezekte saiajailar men shaǵyn aýyldardan balalardy mektepke tasymaldaý máselesin sheshý úshin jergilikti biýdjetten qarjy bólip, satyp alǵaly otyrǵan 70 jańa avtobýstyń bireýi siz turatyn saiajaiǵa bólinetin bolady, - dedi oblys ákimi.
Sol siiaqty Amandyq Batalov Qarasai aýdanynan kelgen, jetim balalarǵa úi berý týraly aitqan Indira Bekbatyrova men Rýslana Vorobevanyń da ótinishterine jiti nazar aýdardy.
Amandyq Batalov jetim balalar belgilengen kezek retine sai turǵyn úimen qamtylýy tiis ekenin aitty. Memleket tarapynan salynyp jatqan árbir turǵyn úi páterleriniń 20 %-i jetim balalarǵa beriledi. Qarasai aýdanynyń ákimine osy máseleni nazarǵa alýdy, sol siiaqty mal dárigeri mamandyǵyna oqyǵan Rýslana Vorobevany jumysqa ornalastyrý jaǵyn qarastyrýdy tapsyrdy.
Bul rette I. Bekbatyrovanyń turǵyn úi kezegindegi kezek reti – 147, al R. Vorobeva 102-shi bolyp turǵanyn aita ketý kerek. Jalpy qazirgi kezde Qarasai aýdanynda «Jetim balalar jáne ata-anasynyń qamqorlyǵynsyz qalǵan balalar» sanatynda 700 adam kezekte tur.
Tyl eńbekkeri, «Altyn alqa» iegeri Ainabala Ábzelbaeva da baspana máselesin kóterdi. Qazirgi kezde kóp balaly ana turǵyn úi kezeginde 238-shi bolyp tur. Taldyqorǵan qalasynyń ákimi Ǵalymjan Ábdiraiymovtyń aitýynsha, turǵyn úi salýdyń josparyna sáikes ótinish iesi biylǵy jyly kezek reti boiynsha kópten kútken baspanaǵa qol jetkize alady.
Gúlsim Ábilmájinova memlekettik turǵyn úi qorynan alǵan úiin jekeshelendirýge kómek surady. Azamatshanyń suraǵyna jaýap bergen oblys ákimi zań boiynsha turǵyn úidi qalǵan qunyn tóleý arqyly jekeshelendire alatynyn túsindirdi.
Sonymen qatar Taldyqorǵan qalasynyń kóshesine ataý berý, Almaty kóp salaly klinikalyq aýrýhanasynyń lor dárigeriniń meditsinalyq qyzmet kórsetý sapasyna narazylyq, sol siiaqty sot daýlaryn sheshýge zańdyq kómek suraǵan máseleler de aityldy.
Árbir suraqqa Amandyq Batalov tolyqqandy jaýap berip, tyńǵylyqty túsindirdi. Bul rette oblystyq densaýlyq saqtaý basqarmasynyń basshysy Baýyrjan Ysqaqtyń jumysyn qatań synǵa aldy. Qabyldaý qorytyndysynda aýdan, qala ákimderine, tiisti basqarmalardyń basshylaryna naqty tapsyrmalar berdi.
