Búgin Almaty oblysy ákimi Amandyq Batalov kóp balaly analardyń belsendi tobyn qabyldady. Ótken jyldyń sońynda kóp balaly analar turǵyn úige qatysty problemalardy alǵa tartyp, másele kótergen bolatyn. Osyǵan bailanysty 2018 jyldyń jeltoqsan aiynda qabyldaýynda bolǵan analarmen búgin Amandyq Batalov taǵy da kezdesti. Basqosýda óz orynbasary Aqan Ábdýáliev pen Taldyqorǵan qalalyq TÚKSh bóliminiń basshysy Nurlan Qystaýbaevtan kóp balaly analardy alǵash qabyldaǵan ýaqytta berilgen tapsyrmalardyń qaisysy qandai deńgeide oryndalǵanyn tápishtep surady.
Aqan Ábdýálievtiń aitýynsha, oblysta 2 myńnan astam kóp balaly ana turǵyn úi kezeginde tur. Aýdan, qala ákimderine toqsan saiyn kezektiń jyljý reti, berilgen úiler týraly esep berip otyrý tapsyrylǵanyn aitty. Qala ákimdigi kóp balaly otbasylarǵa beriletin kópqabatty úidiń orny taiaý arada oblys ákimimen kelisiletinin jetkizdi.
Óz kezeginde kóp balaly analardyń ýájin jáne ákimdik ókilderiniń baiandaýyn tyńdaǵan oblys ákimi A. Batalov aldyńǵy berilgen tapsyrmalardyń, sonyń ishinde kezek reti týraly aqparat berý isiniń áli de rettelmegenin, kóp balaly otbasylaryna arnap úi salý máselesinde de naqty usynys joqtyǵyn synǵa aldy. Eń bastysy qala ákimdiginiń qabyldaýǵa barǵan árbir azamatty jyly qarsy alyp, týyndaǵan máselelerdi zańdyq turǵyda egjei-tegjeili túsindirip berýi kerektigin qadap aitty.
«Men osy kóterilip otyrǵan máselelerdiń qalai sheshilip jatqanyn bilý, sol jumystardan ózderińizdi habardar etip otyrý úshin osyndai qabyldaýdy bir aidan keiin taǵy ótkizemin, iaǵni ai saiyn osylaisha isti pysyqtap, qadaǵalap otyramyn», - dedi A. Batalov kóp balaly analarǵa qaratyp. Al ákimdiktiń jaýapty tulǵalaryna:
«Ótkende berilgen tapsyrmalardy taǵy da qaitalaimyn. Oǵan qosa belsendi top ókilderin qala ákimi Dastan Shaltabaev qabyldap, árqaisymen jeke-jeke áńgimelesip, máseleleriniń sheshilý barysynan habardar etip otyrsyn. Aqpan aiyndaǵy basqosýǵa deiin tyndyrymdy is atqarýylýy kerek», - dedi A. Batalov.
