«AMANAT» partiiasynyń «Jastar Rýhy» jastar qanatynyń volonterleri Ekibastuz qalasynyń jylýsyz qalǵan turǵyndaryna gýmanitarlyq kómekti taratý jumysyna jumyldyryldy.
Ekibastuzda jastar qanatynyń volonterler shtaby turǵyndarǵa kómek kórsetýdi jalǵastyryp jatyr. «Jastar Rýhynyń» belsendileri úi-úidi aralap, jalǵyz turyp jatqan zeinetkerler, múgedekter, muqtaj otbasylar týraly aqparat jinaýda.
Jastar qanatynyń volonterleri apattan qutqarýshy brigadalarǵa ystyq tamaq uiymdastyrý jumysymen de ainalysyp júr.
«Jastar Rýhy» jastar qanatynyń tóraǵasy Nurjan Jetpisbaev Ekibastuzǵa barlyǵy 120-dan astam erikti kelgenin atap ótti. Onyń ishinde 30 adam Astanadan keldi.
«Eriktilerimiz muqtaj jandarǵa kórpe, termos jáne basqa da qajetti zattardy taratyp jatyr. Búgin túnde 1000 jańa elektr jylytqysh tielgen júk túsirdik. Bul zattar ásirese kópbalaly jáne az qamtylǵan otbasylarǵa, erekshe qajettiligi bar adamdarǵa, zeinetkerlerge qajet. Ekibastuz qalasynyń barsha turǵynyna jaǵdai qalypqa kelgenge deiin kómek kórsetemiz. Mundai jaǵdaida syrttan baqylap otyrý múmkin emes. Dál osyndai sátte yntymaq pen birligimizdi tanytýymyz kerek», – dedi ol.
«Jastar Rýhynyń» múshesi Kamil Bairamovtyń bylai deidi: «Qaiǵy-qasiretti ózimdiki nemese ózgeniki dep eshkim bólip-jarmaidy. Osynaý qiyn-qystaý sátte «Jastar Rýhynyń» belsendileri Ekibastuz qalasynyń turǵyndaryna qol ushyn sozyp jatyr. Olar bir kezderi Áýliekólde, Maqtaaral men Arysta zardap shekken halyqqa da dál osylai kómek kórsetken edi».
«Jastar Rýhynyń» belsendisi Arslanbek Maǵzum turǵyndar mundai jaǵdaida kómekke júginýi tiis dep sanaidy.
«Volonterler shtabynda jyly kiim-keshekti, sýdy, basqa da qajetti taýarlardy qai mekenjaiǵa aparý kerektigi týraly ótinimder saralanady. Bizge jylýsyz qalǵan árbir turǵynǵa, árbir otbasyǵa kómek kórsetilgeni mańyzdy», – dedi ol.
Foto avtory: Meiirbek Tájquranov
