.jpeg)
Májilis depýtattary, «AMANAT» partiiasy fraktsiiasynyń músheleri jaǵdaimen tanysý jáne halyqqa jedel kómek kórsetý úshin Ekibastuz qalasyna keldi. Halyq qalaýlylary úi-úidi aralap, jylytqyshtar men jyly kiim-keshek tabystady.
Depýtattar arnaiy qurylǵan jedel shtabta tótenshe jaǵdaidyń jai-japsaryn talqylady. Oǵan oblys basshylyǵynyń, barlyq tehnikalyq qyzmettiń, energetikalyq kásiporyndardyń jáne Energetika ministrliginiń ókilderi qatysty.
Májilis depýtaty Artýr Platonov búginde gýmanitarlyq kómekti jetkizý jumysy belsendi júrip jatqanyn atap ótti.
«AMANAT» partiiasy turǵyndarǵa kómek kórsetý isine belsendi atsalysyp jatyr. Mobildi brigadalardyń quramyndaǵy qoǵam belsendileri úi-úidi aralap júr. Jalǵyz turyp jatqan zeinetkerler, erekshe qajettiligi bar azamattar, muqtaj otbasylar týraly aqparat jinalýda», – dedi ol.
Osy kúni depýtattar qala turǵyndary úshin jylytý pýnkti ornalasqan №36 mektepke bardy. Qalada dál osyndai 12 pýnkt ashyldy. Sonda-aq, halyq qalaýlylary Ekibastuzdaǵy qalalyq aýrýhanaǵa bardy. Qazirgi ýaqytta munda 240 emdelýshi bar.
«Terapiia jáne pediatriia bólimsheleriniń jumysymen tanystym. Aýrýhana shtattyq rejimde jumys istep jatyr. Josparly jáne jedel jetkizilgen emdelýshilerdi qabyldaidy», – dedi Májilis depýtaty Aigúl Nurkina.
Májilis depýtaty Erlan Sairov kináli adamdardy jaýapqa tartý máselesi týraly oiyn bildirdi.
«Elimizdiń energetikalyq aktivterine aýdit júrgizý qajet. Osy igilikterdi ádiletsiz ielenip, túsken qarjyny jańǵyrtýǵa emes, óz qaltasyna salǵan azamattar zań aldynda jaýapkershilikke tartylýy qajet», – dep atap ótti Erlan Sairov.
Májilis depýtaty Vera Kim Ekibastuzda azamattarǵa kómek kórsetý úshin «AMANAT» partiiasynyń «Jastar Rýhy» jastar qanatynyń volonterler shtaby jumys istep jatqanyn jetkizdi.
Ekibastuzda apattyq-qalpyna keltirý jumysy jalǵasyp jatyr.
