«AMANAT» partiiasynyń Atqarýshy hatshysy Ashat Oralov Atyraý oblysynda munai óndirý kásipornynyń ujymymen, balyq sharýashylyǵy salasynyń kásipkerlerimen, jastarmen jáne partiia aktivimen birqatar kezdesý ótkizdi, dep habarlaidy "Ult aqparat".
Ashat Oralov Isatai aýdanyndaǵy munai óndirýshi kásiporyndardyń biriniń ujymymen kezdesip, Konstitýtsiiaǵa ózgerister men tolyqtyrýlar engizý jónindegi aldaǵy referendýmnyń mańyzyn talqylady. Ol aldaǵy reformalar árbir azamatqa qatysty ekenin, sondyqtan árkim referendýmǵa qatysyp, eldiń odan ári damýyna óz úlesin qosýy tiis ekenin atap ótti.
«Konstitýtsiia 1995 jyly qabyldandy, sodan beri ózgerister Parlament arqyly engizildi. Prezident halyqqa Joldaýynda aýqymdy saiasi reformalar baǵytyn jariialady jáne olardy qabyldaýdyń airyqsha quzyretin halyqqa usyndy. Sondyqtan 5 maýsymda bárimiz daýys berýge qatysyp, azamattyq boryshymyzdy oryndaýymyz kerek», dedi Ashat Oralov.
Kezdesý barysynda aýdan munaishylary referendým ótkizý qajettiligin qoldap, birqatar túiitkildi máselelerdi de alǵa tartty. Atap aitqanda, Atyraý-Astrahan avtojolyn jóndeý jumystarynyń uzaqqa sozylýy, Jaiyq ózeni jaǵdaiynyń nasharlaýy siiaqty máseleler kóterildi.
Óz kezeginde, aýdan jastarynyń biri Arystanbek Ǵazizov referendým árbir azamattyń pikirin eskerýge múmkindik beretinin atap ótti.
«Bizdiń munaily ólkeniń jastary Memleket basshysy Qasym-Jomart Toqaevtyń bastamalaryn tolyq qoldaidy jáne men barlyq jastar 5 maýsymda sailaý ýchaskelerine kelip, azamattyq ustanymyn kórsetetinine senimdimin», dedi Arystanbek Ǵazizov.
Budan soń partiianyń Atqarýshy hatshysy balyq sharýashylyǵy sektorynyń kásipkerlerimen kezdesip, salany damytýdyń bolashaǵy men referendýmǵa qoiylǵan Ata Zańǵa ózgerister men tolyqtyrýlar engizýdiń mańyzdylyǵyn talqylady. Búgingi tańda Jaiyq-Kaspii basseininde kásiptik balyq aýlaýmen ainalysatyn 18 iri kásiporyn jumys isteidi. Jalpy, bul salada 20 myńǵa jýyq adam jumyspen qamtylǵan.
«Zańdarǵa referendým arqyly ózgeris engizý biliktiń ashyqtyǵyn, mańyzdy sheshimder qabyldaǵan kezde árbir azamattyń pikirin eskerýge nietti ekenin kórsetedi. Árbir qazaqstandyq óz tarapynan óziniń azamattyq quqyǵyn paidalanyp, daýys berýge qatysýǵa tiis», dep atap ótti kezdesý barysynda balyq ónimderin óndirý zaýytynyń basshysy Aigúl Ámirǵalieva.
Atyraý qalasynda Ashat Oralov «Bereke» shaǵyn aýdanyndaǵy 290 oryndyq balabaqsha qurylysynyń barysymen tanysty. Mektepke deiingi mekeme ótken jyldyń sońynda paidalanýǵa berilýi kerek edi, biraq qarjylandyrýdyń azdyǵynan qurylys uzaqqa sozyldy. Bul másele partiialyq baqylaýǵa alyndy jáne balabaqsha jyl sońyna deiin paidalanýǵa beriledi.
Sondai-aq, Ashat Oralov aimaqtaǵy «AMANAT» belsendilerimen jáne partiia jastar qanatynyń múshelerimen kezdesti. Oblysta 106 bastaýysh partiia uiymyna birikken 24 myń partiia múshesi bar.
