Búgin «AMANAT» partiiasynda «Uly dala» respýblikalyq shyǵarmashylyq baiqaýy qorytyndylandy. Biyl ádebi konkýrs uly aǵartýshy, Ult ustazy Ahmet Baitursynulynyń 150 jyldyǵyna jáne jazýshy Muhtar Áýezovtiń 125 jyldyǵyna arnaldy.
Is-sharany ashqan «AMANAT» partiiasynyń Tóraǵasy Erlan Qoshanov aldaǵy ýaqytta bul jobanyń aiasyn keńeitip, aýdandyq, oblystyq, sodan keiin respýblikalyq deńgeide ótkizýdi usyndy.
«Nebir týma talanttar aýyldarda júr. «Uly dala» baiqaýy sol talanttardyń túlep ushar uiasyna ainalýy tiis. Qazaq ádebietiniń keleshegi tek shyǵarmashylyq qaýymdy ǵana emes, barshamyzdy alańdatady. Ádebiettiń bolashaǵy – ulttyń bolashaǵy. Sondyqtan, jańa dáýirde jańa esimder kerek. Tek olardy izdep-taýyp, qamqorlyq kórsetý qajet. Jastardy yntalandyryp, jolyn ashý úshin «AMANAT» partiiasy osy baiqaýdy uiymdastyryp otyr», – dedi Erlan Qoshanov.
Aita keteiik, 26 tamyz ben 10 qarasha aralyǵynda baiqaýǵa bas-aiaǵy 152 shyǵarma kelip tústi. Onyń barlyǵy aikyn.kz saitynda arnaiy ashylǵan «Uly dala baiqaýy» aidarynda búrkenshik esimmen jariialanyp otyrdy.
«Tolqyndy tolqyn qýady. Keshegi aǵa býynnyń, búgingi orta býynnyń izin jalǵaityn talanttarymyz ádebiet aidynynda az emes. Sondyqtan, daryndy jastardyń sýyrylyp alǵa shyǵýy – zańdylyq. Baiqaýdyń basty maqsaty – jas qalamgerlerdi yntalandyrý, qanattandyrý. Sondyqtan bul baiqaý aldaǵy ýaqytta da jalǵasyn tabady», – dedi Májilis depýtaty, qazylar alqasynyń tóraǵasy Amanjol Áltai.
Sonymen, «Poeziia» nominatsiiasy boiynsha birinshi oryndy aqyn Jánibek Áliman, ekinshi oryndy aqyn Shapaǵat Ábdiruly, úshinshi oryndy aqyn Tańsáýle Ágenqyzy ielendi.
«Proza» nominatsiiasynda birinshi orynǵa jazýshy Álihan Jaqsylyq, ekinshi orynǵa jazýshy Ádil Áýezhanov, úshinshi orynǵa ustaz Aizat Raqysheva laiyqty dep tanyldy.
«Balalarǵa arnalǵan shyǵarma» nominatsiiasy boiynsha birinshi oryndy Alpysbai Ábdiluly, ekinshi oryndy aqyn Quralai Omarova, úshinshi oryndy balalar jazýshysy Aisulý Álmash qanjyǵalady.
«Dramatýrgiia» nominatsiiasynda birinshi oryndy dramatýrg Yqylas Shalǵynbai, ekinshi oryndy jýrnalist Aqlima Saparova, úshinshi oryndy aqyn Toqtaráli Tańjaryq jeńip aldy.
Sonymen qatar, biyl tuńǵysh ret taǵaiyndalǵan «Alash amanaty» arnaiy syilyǵyn alashtanýshy-zertteýshi, balalar jazýshysy Eldos Toqtarbai, «Ahmet Baitursynulynyń 150 jyldyǵyna arnalǵan» arnaiy syilyqty aqyn, jazýshy, kinostsenarist Ularbek Nurǵalymuly ielendi. Al «Muhtar Áýezovtiń 125 jyldyǵyna arnalǵan» arnaiy syilyqty jazýshy Abai Aimaǵambetov jeńip aldy.
«Kez kelgen baiqaý jarq etip jariialanǵanda emes, dástúrge ainalǵan kezde oǵan avtorlar daiyndyqpen kelip, óz jemisin bere bastaidy. Biyl bul shyǵarmashylyq báige Ahmet Baitursynulynyń 150 jyldyǵyna arnalǵannan keiin avtorlarǵa onyń jaýapkershilik júgi jeńil bolmaǵany anyq. Ádebiet – tutas qoǵammen ushtasyp jatqan dúnie. Sondyqtan ádebietti qoldaý – tek rýhaniiatty qoldaý emes, jalpy qoǵamnyń oń betburysyna áser etý degen sóz», – dedi Ularbek Nurǵalymuly.
Sondai-aq, partiianyń Ortalyq apparatynda ótken is-sharada Qostanai oblysynyń Torǵai aýylyndaǵy «A.Baitursynuly men M.Dýlatulynyń ádebi mýzeiiniń» qyzmetkerleri kórme uiymdastyrdy. Onda Ult ustazy tutynǵan zattar, qundy jádigerler, qairatker shyǵarmalarynyń túpnusqasy jáne t.b zattar qoiyldy.
