«AMANAT» partiiasynyń baǵdary Jańa Qazaqstan tujyrymdamasymen úndes bolýy kerek. QR Parlamenti Senatynyń depýtaty Beibit Isabaev osyndai pikir bildirdi, dep habarlaidy QazAqparat.
«AMANAT» partiiasynyń búkil jumysyn reformalaý bastaldy. Qoǵamnyń ózgerister men reformalarǵa degen suranysynyń artýyna bailanysty saiasi reformalardyń aiasynda partiia jumysyn túbirimen qaitadan qamtamasyz etý mindeti qoiylyp otyr. Birinshi kezekte partiianyń bastaýysh uiymdarynyń jergilikti halyqpen bailanysy qaita jolǵa qoiylady. Qoǵamdy, halyqty qandai máseleler tolǵandyryp otyr? Ortalyq apparat pen partiianyń oblystaǵy bólimsheleriniń arasynda jumysty jandandyrý kerek. «AMANAT» ókilderi búgingi memlekettik ideologiiamyzdy qoǵamǵa túsindirip, qoǵam men partiianyń arasyndaǵy túsinistiktiń altyn kópiri bolý kerek», - deidi Senat depýtaty.
Onyń paiymynsha, «AMANAT» partiiasy Jańa Qazaqstannyń ekonomikalyq tuǵyrnamasy nusqaityn baǵdarmen úndesip alǵa jylýy kerek.
«Ókinishke qarai, 30 jyldyq tarihymyzda ekonomikalyq, áleýmettik, saiasi damýymyzda eleýli jetistikterimiz bolýymen qatar, aitarlyqtai kemshilikter de boldy. Ony jasyrýdyń qajeti joq. Memleket basshysy buǵan deiingi Joldaýlarynda, halyqqa qaiyrylýynda bul týraly keńinen aitty. Osy jibergen kemshilikterden durys qorytyndy shyǵaryp, damýdyń jańa, tiimdi, utymdy formattaryn tabýymyz kerek.
Ekonomikamyzdyń aldynda turǵan eń negizgi maqsat – halyqtyń ál-aýqatyn, turmys jaǵdaiyn, tabysyn arttyrý. Jańa Qazaqstannyń ekonomikalyq tuǵyrnamasy osyǵan kelip saiady. «AMANAT» partiiasy da osy baǵdarmen úndesip alǵa jyljýy kerek dep esepteimin», - dedi Beibit Isabaev.
