Astanada «AMANAT» partiiasynyń kezekten tys XXIV Sezi ótti, dep habarlaidy "Ult aqparat".
Is-sharaǵa 1200-den astam adam qatysty. Olardyń qatarynda Saiasi keńestiń músheleri, Parlament depýtattary, óńirlerden kelgen delegattar, sondai-aq sarapshylar, úkimettik emes uiymdardyń ókilderi jáne t. b. boldy.
Kún tártibine sáikes, birinshi kezekte aldaǵy prezident sailaýyna partiiadan kandidat usyný máselesi qaraldy.
Óz sózinde, «AMANAT» partiiasynyń Tóraǵasy Erlan Qoshanov AMANAT partiiasynyń atynan Qasym-Jomart Toqaevtyń kandidatýrasyn usyndy.
«Qazirgi álemdegi kúrdeli jaǵdaida, almaǵaiyp ýaqytta bizge eń áýeli memlekettik jaýapkershilikti tereń sezinetin tegeýrindi Tulǵa kerek. Aýqymdy ózgerister óziniń zańdy jalǵasyn tabýy tiis. Al memleket aldynda turǵan uly maqsat-murattarǵa qol jetkizý úshin bizge laiyqty kóshbasshy kerek. Sondyqtan Prezidenttikke úmitker retinde Qasym-Jomart Kemeluly Toqaevty usynamyn!», – dedi Erlan Qoshanov.
Is-sharada sóz sóilegen Qazaqstannyń tuńǵysh Eńbek eri, ustaz Aiagúl Mirazova Prezident reformalarynyń baǵytyn qoldai otyryp, qoǵamda beibitshilik pen kelisimdi saqtaý qajettigin atap ótti.
«Otan otbasynan bastalady». Olai bolsa biz otbasy qundylyqtaryn, ulttyq salt-dástúrimizdi, tól bolmysymyzdy, ana tilimizdi qurmettep, saqtaýǵa tiispiz. Qasym-Jomart Toqaev kóp qyrly saiasat júrgizýde. Aýqymdy reformalardy qolǵa aldy. Ol ózin halyqqa jany jaqyn tulǵa, tájiribeli basqarýshy retinde kórsetti. Sondyqtan onyń janyna toptasýymyz qajet», – dep atap ótti Aiagúl Mirazova.
Óz kezeginde, Qazaqstannyń eńbek sińirgen jattyqtyrýshysy, Olimpiada oiyndarynyń kúmis júldegeri Dáýlet Turlyhanov Prezidenttiń árbir is-áreketi men reformalarynyń negizinde tek qana halyq múddesi turǵanyn jetkizdi.
«Qasym-Jomart Toqaev – Táýelsizdik qundylyqtaryn qorǵap kele jatqan patriottyń jarqyn úlgisi. Jańa oblystardyń ashylýy, jerdi satýǵa tyiym salý, qazaq tiliniń mártebesi – osynyń bári mańyzdy shoǵyrlandyrýshy ról atqarady. Qasym-Jomart Toqaevty qoldap, Ádiletti Qazaqstandy birge quraiyq», – dedi Dáýlet Turlyhanov.
Aitysker aqyn, partiianyń Saiasi keńesiniń múshesi Bekarys Shoibekovtiń aitýynsha, eń qiyn kezeńderde Qasym-Jomart Toqaev árdaiym halyqpen birge túitkildi máselelerdiń sheshý joldaryn taba bildi. Buǵan Arys, Maqtaaral, Qańtar oqiǵasy, Qostanai mysal bola alady.
«Arandatýshylardyń jeteginde ketpeý kerek. Tek eldegi beibitshilikti saqtai otyryp, turaqty dami alamyz. Etnikalyq, dini, tildik qatystylyǵyna qaramastan jalpyulttyq birlikti saqtaý – Prezident baǵytynyń negizi. Sondyqtan mańyzdy reformalardy júzege asyrý jolynda «AMANAT» partiiasy kandidatynyń ainalasyna toptasýymyz kerek», – dedi aqyn.
Kásipker, Kórý qabiletin qalpyna keltirý jáne aldyn alý mektebiniń negizin qalaýshy Anna Iakovleva Ádiletti Qazaqstan barsha azamattardyń adal eńbegi arqyly ǵana qurylady dep sanaidy.
«Elimizde jáne álemde bolyp jatqan oqiǵalardyń mańyzyn túsine otyryp, óz Prezidentimizge airyqsha senim artamyz. Sondyqtan, barsha otandasymyzdy qasterli Qazaqstannyń qaýipsizdigi jáne odan ári órkendeýi úshin Qasym-Jomart Toqaevtyń ainalasyna birigýge shaqyramyn!», – dedi Anna Iakovleva.
Budan keiin, Mańǵystaý oblystyq máslihatynyń depýtaty Aiat Súgirbai sóz sóiledi. Ol óz sózinde, Prezident qolǵa alǵan ózgerister zań ústemdigine negizdelgen demokratiialyq qoǵamdy qalyptastyrýǵa baǵyttalǵanyn atap ótti.
«Azamattar árbir adamnyń quqy qorǵalǵanyn, laiyqty jalaqy men turaqty jumys orny bolǵanyn qalaidy. El ishindegi «qosarlanǵan bilik, oligopoliianyń yqpaly» siiaqty alyp-qashpa áńgimelerge núkte qoiatyn mezgil jetti. Prezidenttiń qańtardaǵy saiasi erik-jigeri, senimdi áreketteri ony halyq atynan saiasi jaýapkershilikti arqalai alatyn bilikti basshy retinde kórsetti. Qazirgi ýaqytta Qazaqstanǵa dál osyndai kóshbasshy qajet! Sondyqtan biz aldaǵy sailaýda Qasym-Jomart Toqaevtyń kandidatýrasyn qoldaýymyz kerek», – dedi Aiat Súgirbai.
«AMANAT» partiiasynyń «Jastar Rýhy» jastar qanatynyń tóraǵasy Nurjan Jetpisbaev memleket úshin osyndai jaýapty sátte jastar belsendi azamattyq ustanym tanytýy tiis ekenine senimdi.
«Qasym-Jomart Toqaev túbegeili ózgeristerdi kózdeidi. Sonyń nátijesinde biz árbir talantty, eńbekqor, jaýapty qazaqstandyq óz qarym-qabiletin tanyta alatyn memleket quramyz. Al jastar ony tolyǵymen qoldaidy», – dedi Nurjan Jetpisbaev.
Pikir almasyp, daýys berý rásiminen keiin kezekten tys XXIV Sezdiń sheshimimen «AMANAT» partiiasy prezidenttikke Qasym-Jomart Toqaevtyń kandidatýrasyn usyndy.
