Kemerovo oblysynyń gýbernatory Aman Týleev Resei prezidenti Vladimir Pýtinge aitqandai, Kemerovodaǵy órtke erteńgilikte bolǵan otshashý sebep bolýy múmkin.
Pýtin Kemerovo qalasynda órttiń saldaryn joiý boiynsha jinalys ótkizdi.
"Ózim kezdesken adamdardyń aitýynsha, erteńgilikte otshashý bolǵan. Bastapqy derekter boiynsha, kýágerler osylai depti. Bári sodan bastalǵan eken. Ári qarai ózderińiz bilesizder: esikter jabyq, qosalqy esikter de jabyq, jeldetkish bar qýatymen jumys istep tur, al tútin shyǵatyn jer joq", — dedi Týleev jinalys kezinde, dep jazady Kremldiń resmi saity.
Óńir basshysy atap ótkendei, "Adam qaiǵysyn paidalanyp, oppozitsiialyq kúshter kóterilip otyr: úi-úilerge, jaqyn ornalasqan kásiporyndar men jeke sektorǵa baryp júr".
"Qazir 200-dei adam jinaldy. Bular tipti qaza tapqandardyń týysy da emes. Olarmen sóilesip, túsindirip jatyrmyz: "Bulai bolmaidy, qaiǵydan qan jutyp otyrǵanda, óz múddeńdi oilap, problemańdy sheshýge tyrysý durys emes" deimiz(…) Meniń maqsatym — bireýdiń qaiǵysyn paidalanyp, ózderiniń túsiniksiz bir oilaryn iske asyrǵysy keletinderge jol bermeý", — dep jalǵastyrdy Týleev.
Onyń sózine súiensek, ár otbasyǵa materialdyq kómek kórsetildi.
"18 jasqa deiingi balalary aman qalǵandarǵa biz ózimiz kómektesemiz. Men ózim árbir otbasyny qabyldaimyn. Bárimen birdei kezdesemin. Qazir qaryzdar men nesieler boiynsha máseleler sheshilip jatyr. Bul olar kóterip otyrǵan, turmystyq problemalar", — deidi gýbernator.
Jeksenbi kúni Kemerovodaǵy "Zimniaia vishnia" saýda ortalyǵynda órt shyqty. Sońǵy derekterge súiensek, órt saldarynan 64 adam ajal qushqan. Qaiǵyly oqiǵaǵa bailanysty 28 naýryz jalpyulttyq aza tutý kúni bolyp jariialandy.
