Aýyl ákimderin sailaý – Ortalyq Aziianyń eshbir elinde bolmaǵan tájiribe. Qazaqstan Prezident janyndaǵy Strategiialyq zertteý institýty direktorynyń orynbasary Alýa Joldybalina keshegi sailaý osy ereksheligimen tarihta qalatynyn aitady, dep habarlaidy QazAqparat.
«25 shilde Qazaqstannyń tarihynda taǵy bir aitýly kún bolyp tarihqa enedi. Sebebi Ortalyq Aziia memleketteriniń arasynda birinshi bolyp memlekettik basqarýdyń eń tómengi satysynda sailaý ótkizdik. Bul Ortalyq Aziianyń eshbir elinde bolmaǵan tájiribe», - deidi sarapshy.
Sondai-aq, ol ákimder sailaýy byltyr qabyldanǵan saiasi reformalardyń nátijesi ári jalǵasy ekenin eske saldy.
«Mysaly, Májilis sailaýyna úmitkerlerdi usyný tártibine áiel adamdar men jastarǵa 30 paiyzdyq kvota engizdik qoi. Bul jerde ondai kvota bolmaǵanymen, birneshe aimaqtaǵy úmitkerlerdiń tirkelýin taldaý kezinde áiel adamdardyń belsendiligin kórdik. Aqmola, Pavlodar, Soltústik Qazaqstan, Qaraǵandy, Atyraý oblystarynda áiel úmitkerlerdiń belsendiligi 30 paiyz shamasynda bolǵanyn kórdik. Iaǵni Parlament sailaýyndaǵy áielder belsendiligi ákim sailaýyna da áser etken. Áiel adamdardyń depýtattyqqa emes, ákimdikke úmitker retinde tirkelýi óte jaqsy tendentsiia», - dedi QSZI ókili.
Onyń paiymynsha, ákim sailaýy óńirlerdegi saiasi mádeniettiń árkelki ekenin kórsetken.
«Meniń baiqaǵanym, ózin-ózi usynýshylardyń úlesi kóp boldy. Biraq aimaqtyq erekshelikter bar. Aqtóbe, Jambyl oblystarynda ózin-ózi usynǵandardy úlesi kerisinshe az boldy. Al saiasi partiialar kóbirek úmitker usyndy. Taǵy bir erekshelik, Atyraý, Jambyl oblystarynda bir orynǵa orta eseppen 3,6 kandidattan keldi. Demek, báseke joǵary bolǵan», - dedi Alýa Joldybalina.
Sarapshy aýyl ákimderin sailaýdyń alǵashqy kezeńi sátti ótti deýge bolatyn alǵysharttardy atady.
«Keshegi sailaýǵa jurttyń qatysý deńgeii joǵary boldy. 90 paiyzǵa deiin jetken óńirler bar. Eń tómen kórsetkishtiń ózi 75 paiyzdyń ainalasynda. Osylai bolatyny boljandy da. Óitkeni Parlament sailaýynda da, Prezident sailaýynda da aýyl halqy qalalyqtarǵa qaraǵanda óte joǵary deńgeide qatysady. Baiqaýshylardyń málimeti boiynsha, sailaý kezinde sondai bir óreskel zań buzý tirkelmegen. Sondai-aq, qandai da bir arandatýǵa baǵyttalǵan áreketter, jalǵan aqparat taratý bolǵan joq. Osynyń bárin eskeretin bolsaq, keshegi ákim sailaýynyń alǵashqy kezeńi sátti ótti dep aitýǵa bolady», - dedi QSZI direktorynyń orynbasary.
