Qazaqstan Táýelsizdiginiń 30 jyldyǵyna orai QR Aqparat jáne qoǵamdyq damý ministrliginiń qoldaýymen «Qazaqstan» teleradiokorporatsiiasynyń mádeni murany tsifrlandyrý baǵytyndaǵy biregei jobasy altynqor.com mediaportaly iske qosyldy, dep habarlaidy "Ult aqparat".
Saitta Qazaq televiziiasy altyn qoryndaǵy 1930 jyldardan bergi video jáne aýdiomaterialdar, sondai-aq Táýelsizdik jolyndaǵy aitýly tarihi oqiǵalar toptastyrylǵan.
Sait - qarapaiym kórermennen bólek, zertteýshi ǵalymdar úshin ashyq derekkóz retinde paidalanýǵa múmkindik.
Mediaportal «Beineqor», «Aýdioqor», «Tulǵalar» jáne «Fotoarhiv» bólimderinen turady. Ár bólimde televiziia jáne radio ardagerleriniń, qazaq ádebieti men mádenieti qairatkerleriniń suhbattary, estelikteri, jeke arhivi toptastyryldy.
Elbasy N.A.Nazarbaevtyń «Rýhani jańǵyrý» bastamasyn júzege asyrý maqsatynda saitqa batyrlar jyrynyń 50 nusqasy, 100 kúi, 100 ertegi nusqasy, «Syńsý», Besik jyry, «Jar-jar», «Betashar», «Jarapazan», Joqtaý» jinaqtaldy.
«Beineqor» bóliminde S.Áshimbaev, Sh.Murtaza, S. Orazalin júrgizgen «Paryz ben qaryz», «Ult jáne sana», «Suhbat» baǵdarlamalarymen qatar, ár jyldardaǵy «Tamasha», «Halyq qazynasy», «Asyl mura», «Adam izdep júrmin», «Kelesi aialdama», «Kesh jaryq», «Kúltóbe» syndy 800-den astam bólimnen turatyn 50 telehabarlar tsikly, «Sovettik Qazaqstan» kinojýrnaly men «Qazaqtelefilm» óndiristik birlestiginiń jobalary bar.
«Tulǵalar» bóliminde K.Ázirbaev, M.Áýezov, S.Muqanov, Ǵ.Músirepov, Ǵ.Mustafin, Á.Tájibaev, Sh.Jienqulova, K. Baiseiitova, Sh.Aimanov, Sh.Aitmatov, Q.Myrza Áli syndy tulǵalardyń qatysýymen ár jyldary túsirilgen beinetoptamalar qamtyldy.
«Aýdioqor» bólimine 1954 jyldan bergi saqtalǵan M.Áýezov, S.Muqanov, I.Esenberlin, B.Soqpaqbaev, Ǵ.Músirepov syndy 100 ult qairatkeriniń ár jyldary jazylyp alynǵan daýystary bar.
Búginde «Altyn qorda» 110 myńnan astam beine jáne aýdiomaterial bolsa, onyń qatary jyl saiyn 1000 materialmen tolyqtyrylyp otyrady. Sondyqtan saitty toltyrý isi de turaqty túrde jalǵasady.
