Foto: QR Mádeniet jáne aqparat ministrliginiń baspasóz qyzmeti
Qyrǵyzstan prezidenti Sadyr Japarovtyń Qazaqstanǵa resmi sapary aiasynda Qazaqstannyń mádeniet qairatkerlerine memlekettik nagradalar tabystaldy, dep habarlaidy «Ult aqparat» mádeniet jáne aqparat ministrliginiń baspasóz qyzmetine silteme jasap.
Qyrǵyzstan men Qazaqstan arasyndaǵy dostyq pen yntymaqtastyqty nyǵaitýǵa qosqan eleýli úlesi úshin Qyrǵyzstan prezidentiniń jarlyǵymen mádeniettanýshy Murat Áýezov pen aqyn Muhtar Shahanov "Danaker" ordenimen marapattaldy.
Al "Dostýk" ordeni pýblitsist, ádebiettanýshy, jýrnalist, kinosynshy, májilistiń burynǵy depýtaty Saýytbek Ábdirahmanovqa, memleket jáne qoǵam qairatkeri, túrkitanýshy ǵalym Myrzatai Joldasbekovke jáne Ál-Farabi atyndaǵy Qazaq ulttyq ýniversitetiniń basqarma tóraǵasy, rektor Janseit Túimebaevqa tabystaldy.
"Dańk" ordenin Halyqaralyq Túrki mádenieti men murasy qorynyń prezidenti Aqtoty Raiymqulova ielendi.
Sondai-aq "Qyrǵyz Respýblikasynyń Halyq ártisi" qurmetti ataǵy qazaqstandyq belgili kompozitor Altynbek Qorazbaevqa jáne tanymal estrada ánshisi Roza Rymbaevaǵa berildi.
Roza Rymbaeva mádeniettiń shekarasy joq ekenin atap ótti.
"1996 jyly maǵan Qyrǵyzstannyń eńbek sińirgen mádeniet qairatkeri ataǵy berildi. 28 jyldan keiin "Qyrǵyz Respýblikasynyń Halyq ártisi" qurmetti ataǵyn alyp otyrmyn. Bul men úshin úlken jetistik", - dedi ánshi.
Budan bólek "Tań-Sholpan" kórkem-ádebi jýrnalynyń redaktorlar keńesiniń tóraǵasy, bas direktory Didar Qulkenov "Dańk" medalimen marapattaldy.
