Qazaqstannyń Halyq ártisi Altynbek Qorazbaev Qordaidaǵy janjalǵa bailanysty pikirin bildirip, kópti aýyzbirshilikke shaqyrdy, dep habarlaidy QazAqparat tilshisi.
«Qadirli halqym! Jambyl óńirindegi jerlesterim! Kesheli beri aiqai-shý kóbeiip, estýimshe ultaralyq kelispeýshilik bolyp jatqan kórinedi. Ainalaiyndar, biz qazaq degen keń halyqpyz. Qushaǵymyz da keń. Biz óte sanaly da aqyldy, barlyq jaǵynan – saýda bolsyn, óner bolsyn beiim halyqpyz. Kishkene sabyr saqtańyzdar. El ishinde bir-eki buzyq bolýy múmkin. Ol bizde de, basqada da bar. Baiaǵy soǵys kezinde nemisterdi, sheshenderdi, qarashailar men ýkraindardy qushaǵymyzǵa alǵan elmiz. Ákem tipten eki bólmeli kishkentai qorjyn tamyna alty balasymen birdei Muhamet degen qarashai azamatyn panalatqan. Al olar qazir qazaq dese janyn beredi. Ótkenimizge qarap, aqylǵa toqtaiyq», - deidi Altynbek Qorazbaev.
Qazaqstannyń Halyq ártisi zaiyrly ári quqyqtyq memlekette istiń aq-qarasy anyqtalatynyna senim bildirdi.
«Judyryq bizdiki eken dep, óktemdik jasamai-aq qoiaiyq, aǵaiyn. Aqylǵa toqtańdar. Dúngender - eńbekqor. Baiaǵyda esimde Jambyl oblysyndaǵy Ýlanovka degen aýylda dúngennen Keńes odaǵynyń eńbek eri boldy. Jumys dese bular qulshyna kirisetin. Jer tyrmalap jylyna úsh-tórt ret ónim alyp jatatyn. Keshegi Londonda ótken Olimpiada oiyndarynda osy dúngennen sportshylar qazaqtyń kók týyn jelbiretip, álemge qazaqty pash etti. Almatyda dúngennen kompozitor dosym bar. Ol kisi qazaq dese ishken asyn jerge qoiady. Tatý-tátti ómirimizben basqa elge úlgimiz. Kúnde shý men aiqai bolyp jatsa, munyń arty jaqsylyqqa aparmaidy. Aqylǵa kelińder, ainalaiyndar», - dep sózin aiaqtady Altynbek Qorazbaev.
Buǵan deiin Jambyl oblysynyń Qordai aýdanyndaǵy Masanchi aýylynyń turǵyndary arasynda jappai tóbeles bolǵanyn habarlaǵan bolatynbyz.
Kóp ýaqyt ótpei Prezident Qasym-Jomart Toqaev osy oqiǵaǵa qatysty pikir bildirdi.
«Jambyl oblysy Qordai aýdanynda buzaqylyq sipattaǵy jappai tóbeles boldy. Ony arandatýshylar óz paidasyna qoldanbaq bolǵan. Politsiia jaǵdaidy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady», dep jazdy Qasym-Jomart Toqaev Twitter-degi paraqshasynda.
Al búgin Memleket basshysy Jambyl oblysyndaǵy oqiǵaǵa bailanysty málimdeme jasady.
