Búgin mádeniet jáne sport salasynyń maitalmandary memlekettik nagradalarǵa ie boldy, dep habarlaidy QazAqparat.
«Búgin Mádeniet jáne sport ministri Aqtoty Raiymqulova Qazaqstan Respýblikasy Táýelsizdiginiń 30 jyldyǵy qarsańynda Qazaqstan Respýblikasy Prezidentiniń 2021 jyldyń 2 jeltoqsanyndaǵy № 700 Jarlyǵymen memlekettik jáne qoǵamdyq qyzmettegi sińirgen eńbegi, eldiń áleýmettik-ekonomikalyq jáne mádeni damýyna, halyqtar arasyndaǵy dostyq pen yntymaqtastyqty nyǵaitýǵa qosqan eleýli úlesi úshin bir top azamatqa memlekettik nagradalardy tabystady. Is-shara barysynda sóz alǵan Aqtoty Raiymqulova memlekettik nagradamen marapattalǵan qairatkerlerdi quttyqtap, shyǵarmashylyq tabystar men aldaǵy jumystaryna sáttilik tiledi», - delingen atalǵan ministrlik taratqan aqparatta.
Sonymen I dárejeli «Barys» ordeni Muhtar Áýezov atyndaǵy Qazaq ulttyq drama teatrynyń keńesshisi Esmuhan Obaev pen Roza Baǵlanova atyndaǵy «Qazaqkontsert» memlekettik kontserttik uiymyń Almaty qalasyndaǵy filialynyń direktory Altynbek Qorazbaiulyn tabystaldy. Al sport ardageri Ámen Tuiaqovqa II dárejeli «Barys» ordeni, III dárejeli «Barys» ordenimen Jambyl atyndaǵy Qazaq memlekettik filarmoniiasynyń ártisi Nurǵali Núsipjanov pen Temirbek Júrgenov atyndaǵy Qazaq ulttyq óner akademiiasynyń kórkemsýret kafedrasynyń professory Esken Sergebaev marapattaldy.
Munan bólek «Parasat» ordeni Muhtar Áýezov atyndaǵy Qazaq ulttyq drama teatrynyń ártisi Bolat Ábdilmanovqa, «SANALI Group» jaýapkershiligi shekteýli seriktestigi direktorynyń orynbasary Baiken Áshirbaevqa, Aqan Seri atyndaǵy oblystyq filarmoniiasynyń kameralyq horynyń hormeisteri Iýrii Kolchinge, Sháken Aimanov atyndaǵy «Qazaqfilm» aktsionerlik qoǵamynyń dybys rejisseri Qadyr Qosaiǵa, rejisser Amangeldi Tajbaevqa, mádeniettanýshy Abai Tynybekovke tabystaldy. TÚRKSOI Bas hatshysy Dúisen Qaseiinov I dárejeli «Dostyq» ordenin ielendi.
Al II dárejeli «Dostyq» ordeni Maksim Gorkii atyndaǵy memlekettik akademiialyq orys drama teatrynyń ártisi Ekaterina Maksim men germaniialyq ánshi Fridrih Pavelge berildi.
