Foto: Mańǵystaý oblystyq PD baspasóz qyzmeti
Mańǵystaý oblysy politsiia departamenti memlekettik satyp alýlar saitynda syilyqqa arnalǵan saǵattar satyp alatynyn jariialady. Bul týraly óńirlik Lada.kz basylymy jazdy.
Shendiler birden 180 danasyn alýǵa tapsyrys bergen. Qazir ónim berýshilerden ótinimder qabyldanyp jatyr, al ótinim qabyldaý búgin 17:45-te aiaqtalady.
Basylymda memlekettik satyp alý týraly habarlandyrýdyń sýreti de jariialanǵan.
Bir qaraǵanda, bul kádimgi memlekettik tapsyrys siiaqty kórinedi, biraq eń qyzyǵy tehnikalyq sipattamada. Qujattarda saǵattar juqa altyn qabatymen qaptalýy kerek dep kórsetilgen, al baýy mindetti túrde buzaý terisinen bolýy kerek.
Tehnikalyq sipattamaǵa sáikes:
- Mehanizmi – japon nemese shveitsariialyq sapadan tómen bolmaýy kerek, kvartstyq tip.
- Korpýsy tolyq PVD gold (altyn) jabynymen (titan nitridi + 10 mikron altyn).
- Artqy qaqpaǵy – tot baspaityn bolattan.
- Saǵat soqqyǵa tózimdi, áinegi – syzatqa tózimdi mineraldy.
- Sý ótkizbeitindigi – keminde 5 ATM.
- Tsiferblaty – aq emal, arab tsifrlary, diametri 30 mm-den kem emes.
- Baýy – buzaý terisinen, antiallergendi jabynmen, qara nemese qońyr tústi.
- Árbir saǵat danasy politsiia departamentine 11 000 teńgege túsedi. Áielderge arnalǵan 80 saǵattyń quny 880 000 teńgeni, al 100 erler saǵattary – 1 100 000 teńge.
Taǵy bir talap – erekshe qaptama:
- Saǵattar qara nemese qyzyl tústi bylǵarydan jasalǵan, jyltyr qaptamada bolýǵa tiis.
- Ár saǵatqa pasport pen sertifikat qosa beriledi.
- Artqy jaǵynda "QR IIM" logotipi men "MAŃǴYSTAÝ OBLYSY POLITsIIa DEPARTAMENTI" degen jazýy bar lazerlik gravirovka bolýy tiis.
Mańǵystaý oblysy politsiia departamentiniń baspasóz qyzmeti mundai saǵattar departament tarapynan merekelerde erekshe kózge túsken qyzmetkerler men ardagerlerge syilyq retinde beriletinin aitty. Redaktsiiaǵa bergen suhbatynda shendiler osy sývenirlerdiń sýretterin jiberip, olardyń eshqandai ereksheligi joq ekenin málimdedi.
