.jpeg)
Qazaqstan Jazýshylar odaǵynyń Ádebietshiler úiinde «Altyn saqa» balalar ádebieti shyǵarmalarynyń respýblikalyq baiqaýynyń marapattaý rásimi ótti, dep habarlaidy "Ult aqparat".
QR Aqparat jáne qoǵamdyq damý ministrligi men «Qazaqstandyq qoǵamdyq damý institýty» jáne Qazaqstan Jazýshylar odaǵy birlesip uiymdastyrǵan baiqaýdyń marapattaý is-sharasy 28-qyrkúiekte dúniege kelgen qazaq ádebietiniń úsh klassigi Muhtar Áýezov, Sherhan Murtaza, Oralhan Bókeilerdiń týǵan kúnderine orai ótti. Aita ketý kerek, bul baiqaý biylǵy «Balalar jylynyń» aiasynda uiymdastyrylǵan aishyqty sharalardyń biri bolyp tabylady.
Atalǵan sharaǵa QR Aqparat jáne qoǵamdyq damý vitse ministri Daniiar Qadyrov, QJO basqarm tóraǵasy Ulyqbek Esdáýlet, «Qazaqstandyq qoǵamdyq damý institýty» Kommertsiialyq emes Aktsionerlik qoǵamynyń basqarma tóraǵasy, Ulttyq quryltai múshesi Qazbek Ómirzaquly Maigeldinov, qazaqtyń dáýlesker kúishisi, QR Eńbek sińirgen ártisi, «Qurmet», «Parasat» ordeniniń iegeri Seken Turysbek arnaiy qatysyp, jas qalamgerlerge aq jol tiledi.
Sharanyń shymyldyǵy Qazaqstan Jazýshylar odaǵynyń Basqarma Tóraǵasy Ulyqbek Esdáýlettiń jáne QR Aqparat jáne qoǵamdyq damý vitse-ministri Daniiar Ramazanulynyń sózimen ashyldy.
Báigege 152 avtordan 180-ge tarta shyǵarma usynylǵan. Onyń 30-y baiqaý talaptaryna sai emes. Alaida 122 jas qalamgerdiń 41 ertegisi, 81 shaǵyn áńgimesi dodaǵa qatysýǵa laiyq dep tanylyp, onyń 12-sine oryn buiyrdy.
"Ulttyq sanany tamyrynan úzip almai, jańa zamanǵa sai etip beiimdeýdiń basty tetikteriniń biri – jas urpaqty ulttyq ádebietimizdiń qainar-kózimen sýsyndata bilý óte ózekti. Qazirgi tańda qazaq tilinde balalar ádebieti baǵyty boiynsha jańa esimder kóp emes. Sondyqtan osy jobaǵa erekshe kóńil aýdaryp otyrmyz. Mundai baiqaýlar balalardyń ádebietke, shyǵarmashylyqqa, kitap oqýǵa degen qyzyǵýshylyǵyn arttyrady degen senimdemiz" - dep atap ótti «Qazaqstandyq qoǵamdyq damý institýty» Basqarma Tóraǵasy Q. Maigeldinov.
Báigege Aqyn, QJO basqarmasynyń I orynbasary, «Qurmet» ordeniniń iegeri Aqberen Elgezek, balalar jazýshysy, stsenarist, «Altyn Qalam – 2014» táýelsiz ádebi baiqaýynyń jeńimpazy Záýre Tórehanova, belgili jazýshy, Halyqaralyq «Alash» ádebi syilyǵynyń iegeri Qýandyq Túmenbai, belgili balalar jazýshysy, Halyqaralyq «Alash» ádebi syilyǵynyń iegeri Dildar Mamyrbaeva, jazýshy, Halyqaralyq «Daraboz» ádebi baiqaýynyń jeńimpazy Beibit Sarybai tórelik etti.
Baiqaý nátijesi boiynsha «Shaǵyn áńgime» atalymynda 1-oryndy Doshan Jylqybai «Tús kóre alatyn robot» shyǵarmasy úshin ielendi. Al «Qozynyń perishtesi» atty áńgimeniń avtory Saǵynbaeva Dámetken 2-oryn aldy. 3-oryn Jantas Erkinulyna «Aq shash» áńgimesi úshin berildi. Yntalandyrý syilyqtary Erzat Moldabekulyna («Mamyrgúl» áńgimesi), Dilnaz Esbolatovaǵa («Marstaǵy bir kún» áńgimesi), Aigólek Ómirbekke («Áke» áńgimesi), Gúlden Jylkeldievaǵa («Pýma» áńgimesi), Nursultan Serikbaevqa («Sheshilmegen jumbaq» áńgimesi) tabystaldy.
«Ertegi» atalymynda baq synaǵan jas jazýshylardyń ishinde «Renjisken kitap pen adamdy smartfon qalai tatýlastyrdy» atty ertegisimen oza shapqan Azamat Ábilqaiyr 1-oryndy qanjyǵasyna bailady. 2-oryn «Bult-shári» ertegisi úshin Nurjan Nurbekke buiyrdy. «Siqyrly kitap» ertegisiniń avtory Qazim Tilekqabyl 3-oryn aldy. Kókbóri Qizat («Qazaqtyń anasy bolǵan máńgi qartaimaityn úsh peri qyzy» ertegisi), Gúlbaqyt Ábsat («Eń sulý qus» ertegisi), Erjan Kúrkeev («Tis jegi qalai paida boldy?» ertegisi), Aiym Mahaeva («Aýa satatyn patsha» ertegisi), Aziza Ýrah («Patsha arystan» ertegisi) yntalandyrý syilyǵyn mise tutty.
