Almaty oblysynda áleýmettik mańyzy bar azyq-túlik baǵasynyń shekten tys sharyqtaýy taǵy da qoǵam nazaryn aýdartty. Kúndelikti tutynatyn nan men azyq-túliktiń baǵasy halyq qaltasyna salmaq salǵan tusta, baqylaý organdary deldaldyq tizbektiń jasyryn tetikterin áshkereledi, dep habarlaidy ult.kz.
Saýda jáne integratsiia ministrliginiń málimetinshe, birqatar iri saýda sýbektileri – JK «Omarov», «Iceberg Distribution» JShS jáne «Ar Dias» JShS – áleýmettik mańyzy bar ónimderdi tómen baǵamen satyp alyp, ony naryqta birneshe esege qymbattatyp qaita ótkizgen. Saýda ústemesiniń 17 paiyzdan bastap 86 paiyzǵa deiin jetýi – naryqtyq ádilettilikke selkeý túsirgen óreskel jaǵdai retinde baǵalandy.
Zań buzýshylyqtarǵa bailanysty jospardan tys tekserýler júrgizilip, tiisti sýbektilerge aiyppul salynǵan. Jyl basynan beri bul baǵyttaǵy baqylaý jumystarynyń nátijesi de az emes: 171 saýda sýbektisine qatysty 643 ákimshilik hattama toltyrylyp, 3,4 million teńgeden astam aiyppul óndirilgen.
Budan bólek, áleýmettik mańyzy bar taýarlarǵa belgilengen shekti ústemeniń saqtalmaýy – eń jii tirkelgen zań buzýshylyqtardyń biri. 467 hattama dál osy talaptyń buzylýyna qatysty rásimdelgeni sony ańǵartady. Al keibir saýda oryndarynda ústeme baǵanyń tipti 203 paiyzǵa deiin jetýi naryqtaǵy baqylaýdyń álsiz tustaryn da aiqyn kórsetip otyr.
Eń ózekti máseleniń biri – «Altyn Orda» bazaryndaǵy jaǵdai. Óńirlik komissiia júrgizgen jospardan tys tekserý nátijesinde 13 saýda sýbektisi baqylaýǵa alynyp, olardyń arasynan 7 deldaldyń qyzmeti toqtatyldy. Resmi derekke súiensek, dál osy deldaldyq tizbek baǵanyń negizsiz ósýine tikelei yqpal etken.
Ministrlik qazirgi tańda óndiris pen iri jetkizýshiler arasyndaǵy bailanystardy naqtylaý, elektrondyq shot-faktýralar arqyly deldaldyq shemalardy áshkereleý jumystaryn kúsheitkenin málimdedi. Bul – azyq-túlik naryǵyndaǵy «kórinbeitin qoldy» tártipke salýǵa baǵyttalǵan qadamdardyń biri.
Azyq-túlik baǵasy – tek ekonomikalyq kórsetkish emes, áleýmettik kóńil kúidiń de ólshemi. Sondyqtan da mundai tekserýlerdiń túpki maqsaty – naryqty tusaýlaý emes, tutynýshy men óndirýshi arasyndaǵy ádiletti araqashyqtyqty qalpyna keltirý.
