Qazaqstandyqtar 2022 jyldyń naýryzynda 2021 jylmen salystyrǵanda altyn quimalardy 2,9 ese kóp satyp alǵan. Bul týraly Ulttyq bank habarlady.
"2022 jylǵy naýryzda ekinshi deńgeili bankter men jekelegen banktik emes aiyrbastaý pýnktteri jalpy salmaǵy 167,2 keli 8 269 quima satty, bul 2021 jyldyń osy kezeńimen salystyrǵanda 3 ese kóp (salmaǵy 48,2 keli 2 898 quima).
Satylymnyń ulǵaiýyna altynǵa investitsiia quiýǵa qyzyǵýshylyǵy artqan halyqtyń suranysy yqpal etip otyr. Sebebi qarjy naryǵyndaǵy belgisizdik pen valiýta baǵamy qubylmaly bolyp turǵan shaqta kópshilik buǵan jinaqtarynyń saqtalýyn qamtamasyz etýdiń balamaly quraly retinde qaraidy", - delingen habarlamada.
Halyqqa tazartylǵan altyn quimalardy satý jáne satyp alý baǵdarlamasyn Ulttyq bank 2017 jyly iske qosqany aityldy. Baǵdarlama qolǵa alynǵaly jalpy salmaǵy 3 tonnaǵa jýyq 87 531 altyn quima satylǵan.
Altyn quimalar bes túrli salmaqta usynylady: 5, 10, 20, 50 jáne 100 gramm.
"Satyp alýshylar arasynda óte joǵary suranysqa ie túri – 10 gramdyq quima. Jalpy satylǵan quimalar arasynda onyń úlesi - 27 paiyz, iaǵni, 23 390 dana. Odan keiin 20 gramdyq quima suranysqa ie, 18 178 dana (21 paiyz), 100 gramdyq quimadan 18 034 dana (20 paiyz), 5 gramdyq quimadan 16 834 dana (19 paiyz), 50 gramdyq quimadan 11 095 dana (13 paiyz) satyldy. Altyn quimalar Almaty, Nur-Sultan jáne Atyraý qalalarynda kóp satylady", - deidi UB baspasóz qyzmeti.
Altyn quimalar senimdi investitsiia quraly bola alady. Altyn quimalar naryǵyndaǵy ótimdiliktiń basty kepili - bank pen banktik emes aiyrbastaý pýnktteri klientke aqshany sol kúni tólei otyryp, altyn quimalardy keri satyp ala alady.
Baǵdarlama bastalǵaly beri ekinshi deńgeili bankter men jekelegen banktik emes pýnktter jalpy salmaǵy 303,3 keli 12 367 altyn quimany keri satyp alǵan, bul – jalpy satylǵan altyn quimalardyń 14 paiyzy. Olar keri satyp alǵan altyn quimalardyń barlyǵy Ulttyq banktiń filialdary arqyly halyqqa satylady.
