Ulttyq park aýmaǵynda jabaiy tabiǵattaǵy erekshe sát fototuzaqqa túsip qaldy, dep habarlaidy ult.kz.
«Altyn-Emel» memlekettik ulttyq tabiǵi parkinde bir sýattyń basynda búrkit pen qaraquiryqtar qatar júrgen sát tirkeldi.
Kadrda jyrtqysh qus pen qaraquiryqtardyń bir-birine jaqyn turǵanyna qaramastan, janýarlardyń aitarlyqtai alańdamaǵany baiqalady.
Búrkit qaraquiryqtyń jas tólderine qaýip tóndirýi múmkin jyrtqyshtardyń biri sanalady. Al qaraquiryqtar mundai qustan ádette saq júredi. Sondyqtan olardyń bir sýat basynda qatar kezdesýi erekshe nazar aýdartty.
Mamandardyń pikirinshe, buǵan jazǵy aptap pen sýǵa degen qajettilik áser etýi múmkin. Qatty ystyq kezinde sýattar shóleittegi janýarlar úshin asa mańyzdy orynǵa ainalady. Mundai jaǵdaida sý ishý qajettiligi tabiǵi saqtyqtan basym túsýi yqtimal.
Osylaisha, fototuzaq «Altyn-Emeldiń» jabaiy tabiǵatyndaǵy tosyn kezdesýdiń únsiz kýágerine ainaldy.
