QR Bilim jáne ǵylym vitse-ministri Sholpan Karinova biylǵy «Altyn belgi» úmitkerleri tapsyratyn emtihandarǵa qatysty ózgerister jaiynda málim etti, dep habarlaidy QazAqparat.
«Biyl «Altyn belgi» tósbelgisin ielený erejesine ózgeris engizildi. Ondaǵy maqsat - ashyqtyq pen ádildikti qamtamasyz etý. Oqýshylar emtihandy 5 pán boiynsha tapsyrady. Osy oraida eskeretin jait, emtihan pánderi, tapsyrmalardyń mazmuny ózgergen joq. «Altyn belgi» emtihandary 5-11 synyp aralyǵyndaǵy oqý baǵdarlamasy aiasynda ázirlenedi. Biylǵy basty ózgeris úmitkerler matematika páninen emtihandy Nazarbaev ziiatkerlik mektebi bazasynda tapsyrady. Iaǵni, atalǵan mektepke barady. Osy shara akademiialyq adaldyqty qamtamasyz etý úshin qolǵa alynyp otyr. Óitkeni oqýshy óz mektebinde emtihan tapsyrǵanda, oǵan muǵalimi kómektesýi múmkin», - dedi Sholpan Karinova ministrlikte ótken tikelei efir barysynda.
Onyń aitýynsha, NZM bazasynda ótetin emtihannyń mazmuny men deńgeii boiynsha ózgeris joq. Emtihan tapsyrmasy mektep baǵdarlamasyna sai ázirlenedi.
«Oqýshy «Altyn belgige» úmitker bolý úshin 5-11 synyp aralyǵynda barlyq toqsandyq baǵalary tek «5» bolýy tiis. Sonymen qatar, oqýshy nemese ata-anasynyń sheshimimen «Altyn belgige» úmitker bolýdan bas tartýǵa da bolady. Tańdaý oqýshynyń óz erkinde. Bas tartqan jaǵdaida oqýshy barlyq emtihandy óz mektebinde tapsyrady. Sol siiaqty «Altyn belgiden» bas tartqan oqýshy úzdik attestat ala alady», - deidi ol.
