Mektep túlekterin UBT-ǵa kirgizý kezinde Face-ID júiesi arqyly 4 bógde tulǵa anyqtaldy, dep habarlaidy "Ult aqparat".
Osylaisha, 4 talapkerdiń ornyna testileýge elordalyq eki joǵary oqý ornynyń 4 stýdenti qatyspaq bolǵan.
Ol úshin jalǵan qujattar da jasalǵan. Degenmen, tulǵany tsifrlyq sáikestendirý Face-ID júiesi atalǵan kemshilikterdi anyqtaýǵa múmkindik berdi. Bul júie biyl UBT tapsyratyn barlyq ortalyqta engizildi.
«Bógde tulǵalar aýditoriiaǵa kire almady, óitkeni UBT-ǵa kirgizý tulǵany sáikestendirý Face ID baǵdarlamasy arqyly júrgiziledi. Baǵdarlama tipti egizderdi de anyqtai alady. Ulttyq testileý ortalyǵynyń qyzmetkerleri UBT tapsyrý kezinde mektep oqýshylary tarapynan oryn alýy múmkin buzýshylyqtardy qalai anyqtaý kerektigin jaqsy biledi. Testileýge óz ornyna bógde adamdy kirgizbek bolǵandardyń arasynda «Altyn belgi» iegeri da bar», – dep atap ótti QR BǴM Ulttyq testileý ortalyǵy direktorynyń mindetin atqarýshy Naýjan Didarbekova.
Testilenýshiler men bógde tulǵalarǵa qatysty aqparat quqyq qorǵaý organdaryna jiberildi. Olarǵa qatysty QR Qylmystyq kodeksiniń 385-baby 2-bóligi boiynsha qylmystyq is qozǵaldy.
Biyl UBT tapsyrý nysandarynda úsh satyly júie engizilgen. Atap aitsaq, testilenýshi jeke kýáligin kórsetedi, keiin Face-ID júiesinen ótedi. Sondai-aq árbir testileýshiniń aldynda kamera ornatylǵan.
Osy sharalardyń barlyǵy Ulttyq biryńǵai testileýdi tapsyrý rásiminiń ashyqtyǵyn qamtamasyz etýge baǵyttalǵan.
Búgingi tańda ulttyq biryńǵai testileýdi tapsyrǵandardyń sany - shamamen 150 myń adam.
Osy rette QR BǴM Ulttyq testileý ortalyǵy talapkerlerdi akademiialyq adaldyq qaǵidalaryn saqtaýǵa shaqyrady.
