Álemde altyn arzandasa da, Qazaqstannyń altyn valiýta qory ulǵaidy. Bul týraly QR Ulttyq bankiniń tóraǵasy Erbolat Dosaev Úkimet otyrysynda málim etti, dep habarlaidy QazAqparat.
«Eldiń altyn valiýta rezervteri bir aida 1,8 mlrd AQSh dollaryna ulǵaiyp, tamyzdyń sońynda 36,8 mlrd AQSh dollaryn qurady. Altyn portfeli bir ýntsiia úshin 1 814 AQSh dollaryna deiin (0,8%-ke) tómendegenine qaramastan, basym quqyqty paidalanyp altyn satyp alý esebinen 134 mln AQSh dollaryna ósti», - deidi Ulttyq bank tóraǵasy.
Sonymen birge, ol tamyz aiynda Halyqaralyq valiýta qorynan arnaiy qaryz alý quqyǵy 1,6 mlrd dollar sheginde bolǵanyn, ekinshi deńgeidegi bankterdiń shetel valiýtasyndaǵy korrespondenttik shottary men depozitteri óskenin atady.
«Ulttyq qordyń aktivterin qosa alǵanda, jalpy halyqaralyq rezervter bir aida 1,8 mlrd AQSh dollaryna ulǵaiyp, 93,7 mlrd AQSh dollaryn qurady», - dedi Ulttyq bank basshysy.
