Úkimettiń búgingi otyrysynda QR Mádeniet jáne sport ministri Arystanbek Muxamediuly Esik qorǵanynda tabylǵan Altyn adamdy álemge keńinen nasixattap, Rembrant pen Leonardo da Vinchidiń týyndylary deńgeiine deiin kóterýdi usyndy. Osynyń arqasynda Qazaqstanǵa týristerdi kóptep tartýǵa bolady, dep xabarlaidy QazAqparat tilshisi.
"Álem boiynsha mýzeilerge týristerdiń kóptep baratyny belgili. Bárimiz jaqsy bilemiz, ondai mýzeilerdiń árbireýinde bir shedevr bar. Máselen, Lývrǵa baratyndardyń 70-80 paiyzy Leanardo da Vichnidiń "Djokondasyn" kórýge asyǵady. Al Ermitajda Remrandtyń "Adasqan uldyń oralýy" atty týyndysyn kórgisi keledi. Árine, ózimizdiń Ulttyq mýzeiimizge degen týra sondai qyzyǵýshylyqty týǵyzý úshin qymbat bir shedevrdi satyp alý qajet. Al Sotbis aýktsionynda ol shedevrlerdiń tómengi baǵasy 100 million dollardan bastalady", - deidi Muxamediuly.
Osy oraida ministr Altyn adam siiaqty Qazaqstannyń ózindik shedevrin keńinen nasixattaý qajet dep sanaidy. Ol úshin álemdik aty bar mýzeilerde kóshpeli kórmelerdi uiymdastyryp, tanymal arnalardan Altyn adam týraly derekti jáne animatsiialyq filmderdi kórsetýge bolady.
"Áli esimde, Reseidiń Memlekettik Ermitajyna Altyn adamdy alǵash ret aparyp qoiǵanda biraz qiynshylyqtar boldy. Sol kezde biz Petrovskii myrzadan ekpozitsiiany 20 kúnge deiin uzartýdy suraǵanbyz. Alaida eki aptadan keiin ol ózi qońyraý shalyp, Altyn adamdy eki aiǵa deiin qaldyrýdy surady. Bul degenimiz, jergilikti xalyqtyń tarapynan úlken qyzyǵýshylyq boldy", - dep atap kórsetti Arystanbek Muxamediuly.
