25 tamyz kúni KazTAG jáne basqa da birqatar buqaralyq aqparat quraldary ekibastuzdyq alty mektep direktorynyń aiyppul arqalaǵany jaily aqparat taratty.
«Politsiia qyzmetkerleri tekseris kezinde ekibastuzdyq alty mekteptegi beinebaqylaýdyń terrorshyldyqqa qarsy qorǵanys talaptaryna sai emestigin anyqtady», - degen málimet «Pavlodar onlain» paraqshasynda da jariia boldy. Aqparatta mamandandyrylǵan ákimshilik sot sheshimimen mektep basshylaryna 389 myń teńgege aiyppul salynǵany aitylǵan.
«Búgingi tańda Pavlodar oblysynda lańkestik táýekeline jaqyn 727 nysan bar, onyń 596-sy – oqý oryndary, aýrýhanalar, saýda úileri, kóńil kóterý oryndary siiaqty kópshilik jinalatyn oryndar men vokzaldar. Ekibastuzdyń bilim mekemelerin tekserý kezinde terrorshyldyqqa qarsy is-qimyl talaptaryn buzýdyń alty faktisi anyqtaldy. Mysaly, №36 mektep-litseide, №23 orta mektepte, №11, №33, №2 jáne №35 mektepterde beinebaqylaý júiesiniń talapqa sai emestigi belgili boldy. Osyǵan orai, politsiia qyzmetkerleri QR Ákimshilik quqyq buzýshylyq kodeksiniń 149-babyna sáikes, materialdardy sotqa joldap, nátijesinde basshylarǵa 200 AEK kóleminde aiyppul salyndy, bul – 389 teńge shamasy», - deidi Pavlodar oblystyq politsiia departamenti ekstremizmge qarsy is-qimyl bóliminiń basshysy Janat Sliamov.
Al endi beinebaqylaý júiesiniń talapqa sai emestigin bilmeitindei, bul alty mekteptiń direktorlary aiaqtary salbyrap aspannan jańa tústi me? Joq, árine!
Ekibastuzdyń barlyq mektebinde qalalyq bilim bólimine Jazira Hamzabaeva basshy bolyp kelgenge deiin beinebaqylaý júiesi dup-durys edi. Jazira Amangeldiqyzy basshy bolysymen «jer astynan jik shyqty, eki qulaǵy tik shyqty». Jazira hanym men esep-qisap bóliminiń qyzmetkeri Arai Ábikenova (Hamzabaevanyń sińlisi) direktorlardy birneshe ret jinap, mektepterdegi beinebaqylaý júiesine qyzmet kórsetip otyrǵan pavlodarlyq firmamen kelisimshartty buzý jáne ekibastuzdyq «GlazOK» JK-men jańadan kelisimshart jasasý kerektigin aitady. Basshylyq tarapynan bulaisha pármen berý birneshe ret qaitalanǵan soń barlyq basshy astarynan sý shyqqandai pavlodarlyq firmamen kelisimdi buzady.
«Baqsaq, baqa eken» demekshi, kezinde pavlodarlyq firma birer baqylaý kamerasyn bilim mekemelerine tegin quryp berse kerek. Kelisimshart buzyla salysymen olar ózderi tegin qurǵan kameralardy túgel sheship áketedi. Biraq «GlazOK» JK olardyń ornyn toltyrýǵa asyqpaidy. Asyqpaityn sebebi de bar. Birinshiden, bul jańadan ashylǵan firma bolatyn, sol sebepti de kamera ornata qoiarlyq keremet qaýqary bola qoimaǵany anyq. Jumysker sany da jetkiliksiz. Bul firmanyń ómirge kelýi, iaǵni, kásipker retinde tirkelý ýaqyty da Hamzabaeva hanym basshy bolǵannan sál keiin. Netken sáikestik deseńizshi! Naryqta az ǵana ýaqyt jumys istep turǵanyna qaramastan, 2020 jyl basynan osy ýaqytqa deiin 94 kelisimshart jasasyp, 25 million teńgeden astam soma paida tapqan. Kelisimsharttarynyń basym bólimi Ekibastuz óńiriniń mektepteri men balabaqshalaryna tiesili. Qalaisha tańǵalmassyz!
Ekinshiden, atalmysh firma áýeli óziniń montajdaý qyzmeti úshin 300 myń teńge suraǵan kórinedi. Odan keiin bilim mekemeleri ai saiyn kameralardy ustaýǵa 15 myń teńge tólep turýy tiis bolady. Tólep jatyr da. Úlgergender 300 myń teńgege ornatyp úlgeredi, biraz ýaqyttan soń firma montajdaý baǵasyn 380 myń teńge etip ózgertedi. Jáne kelisimshartqa otyrǵannyń ózinde tolyp jatqan mektepti firmadaǵy bir-eki adam qajetti kameralar sanymen qamtamasyz etip úlgere almaidy. Ol eki ortada mektepterge tekseris kelip úlgeredi. Al burynǵy pavlodarlyq firmamen jumysty jalǵastyra berse, mektepter (balabaqshalar da bar) mundai 300-380 myń teńge qosymsha shyǵynǵa ushyramas edi. Bilýimizshe, aldaǵy ýaqytta jetpeitin kameralarǵa biýdjetten taǵy da aqsha bólinetinge uqsaidy. Biýdjet aqshasyna tiispei-aq, pavlodarlyq firmamen yń-shyńsyz jumysty jalǵastyra berse qaitetin edi? Ekibastuz qalasy biýdjetiniń basy artyq aqshasy kóptigin osydan bile berińiz!
Bilim bólimi basshysynyń túrtpekteýi kesirinen bastary pálege qalǵan direktorlar endi aiyppuldy óz qaltasynan tólei me, álde taǵy da biýdjettiń mol aqshasynan tóler me eken? Jáne aiyppul arqalaityndar tek osymen shektele me?!
Jalpy, bilim bóliminiń esep-qisap qyzmetinde eńbek etetin Arai Ábikenovanyń aýyl mektepterine qatysty tenderlermen (máselen, Qoiandy, Qarasý aýyldary) shimai-shataǵy bar dep estimiz. Degenmen munyń anyq-qanyǵyn tekserýdi quzyrly organdar enshisine qaldyrdyq!
Dastan Serik, Ekibastuz
Sait ákimshiligi maqala avtorynyń qandai da bir dálel-dáiekteri, oi-pikiri hám tujyrymdary úshin jaýap bermeidi. Jeke avtorlar maqalasy "Ult portalynyń" óz ónimi bop eseptelmeidi.
