Qazaqstanda fýtbol maýsymy aiaqtaldy. Premer-ligada «Astana» komandasy taǵy da elimizdiń chempiony atandy.
Al birinshi ligada Qyzylordanyń «Qaisary» jeńiske jetip, premer-ligada on ekinshi oryndaǵy komandany aýystyrdy. Bizdiń oblystyń «Altaiy» ekinshi orynǵa shyǵyp, premer-ligada 11-orynda bolǵan «Taraz» komandasymen joǵary topqa shyǵýǵa joldama úshin kezdesýge múmkindik alǵan.
Ótken senbide Astanada «Taraz» ben «Altai» sol joldamany sarapqa saldy. Oiyn basynan aiaǵyna deiin shyǵysqazaqstandyqtardyń basymdyǵymen ótti. Kezdesýdiń 4-minýtynda Shakin «Taraz» qaqpashysyn qapy qaldyrdy. Birinshi taimnyń sońynda tarazdyqtar óz oiyn alańynda oiyn erejesin óreskel buzǵany úshin bas tóreshi II metrlik aiyp dobyn belgiledi. Ony Shaff qaqpaǵa dál soqty. Ekinshi taimnyń basynda altailyqtar «Taraz» komandasyn múlde tuqyrtty. Sóitip, 3:0 esebimen iri jeńiske jetken jerlesterimiz kelesi maýsymda el birinshiliginiń eń joǵary ligasynda oinaidy. «Altaidy» maýsymdaǵy tabysymen quttyqtap, aldaǵy aiqastarda da jankúierdiń kóńilinen shyǵa berýine tilektespiz.
Syrt aidyndarda sátti oinady
Óskemenniń «Torpedosy» ótken aptada syrt aidyndarda eki oiyn ótkizdi. Saratovta «Kristaldy» 8:1 esebimen utqanyn habarlaǵanbyz. Al 5-qazanda Penzada «Dizeldiń» qabyldaýynda boldy. Munyń aldyndaǵy kezdesýinde penzalyqtar 2:1 esebimen «Saryarqany» utqan. Jankúierlerde «Torpedo» da jeńilip qalmas pa eken degen kúdik bolǵany ras. Esepti aldymen aidyn ieleri ashty. Biraq birinshi kezeńniń sońyna taman Aleksandr Shin esepti teńestirdi. Ekinshi kezeńde Vladimir Korotkov meimandardy alǵa shyǵardy. Esepti teńestirýge tyrysqan «Dizel» komandasynyń jattyqtyrýshylary oiynnyń sońǵy minýttarynde qaqpashyny altynshy oiynshyǵa almastyrdy. Alaida, odan eshteńe shyqpady. Bos qaqpaǵa Maksim Iýshkov úshinshi gol soqty.
Keshegi kúnge «Torpedo» 34 upaimen týrnir kestesiniń 8-ornynda tur. Al sońǵy kezdesýin Saratovta ótkizgen «Saryarqa» (Qaraǵandy) «Kristaldy» 5:0 esebimen utyp, jarys kóshin bastap keledi.
Aldaǵy tórt kezdesýin «Torpedo» óz aidynynda ótkizedi. 10-qarashada óskemendikter Kazannyń «Barsyn» qabyldaidy.
J.Ábenov
