«التاي» - پرەمەر-ليگادا

قازاقستاندا فۋتبول ماۋسىمى اياقتالدى. پرەمەر-ليگادا «استانا» كومانداسى تاعى دا ەلٸمٸزدٸڭ چەمپيونى اتاندى. 

ال بٸرٸنشٸ ليگادا قىزىلوردانىڭ «قايسارى» جەڭٸسكە جەتٸپ, پرەمەر-ليگادا ون ەكٸنشٸ ورىنداعى كوماندانى اۋىستىردى. بٸزدٸڭ وبلىستىڭ «التايى» ەكٸنشٸ ورىنعا شىعىپ, پرەمەر-ليگادا 11-ورىندا بولعان «تاراز» كومانداسىمەن جوعارى توپقا شىعۋعا جولداما ٷشٸن كەزدەسۋگە مٷمكٸندٸك العان. 

ٶتكەن سەنبٸدە استانادا «تاراز» بەن «التاي» سول جولدامانى ساراپقا سالدى. ويىن باسىنان اياعىنا دەيٸن شىعىسقازاقستاندىقتاردىڭ باسىمدىعىمەن ٶتتٸ. كەزدەسۋدٸڭ 4-مينۋتىندا شاكين «تاراز» قاقپاشىسىن قاپى قالدىردى. بٸرٸنشٸ تايمنىڭ سوڭىندا تارازدىقتار ٶز ويىن الاڭىندا ويىن ەرەجەسٸن ٶرەسكەل بۇزعانى ٷشٸن باس تٶرەشٸ ٸٸ مەترلٸك ايىپ دوبىن بەلگٸلەدٸ. ونى شافف قاقپاعا دەل سوقتى. ەكٸنشٸ تايمنىڭ باسىندا التايلىقتار «تاراز» كومانداسىن مٷلدە تۇقىرتتى. سٶيتٸپ, 3:0 ەسەبٸمەن ٸرٸ جەڭٸسكە جەتكەن جەرلەستەرٸمٸز كەلەسٸ ماۋسىمدا ەل بٸرٸنشٸلٸگٸنٸڭ ەڭ جوعارى ليگاسىندا وينايدى. «التايدى» ماۋسىمداعى تابىسىمەن قۇتتىقتاپ, الداعى ايقاستاردا دا جانكٷيەردٸڭ كٶڭٸلٸنەن شىعا بەرۋٸنە تٸلەكتەسپٸز. 

سىرت ايدىنداردا سەتتٸ وينادى

ٶسكەمەننٸڭ «تورپەدوسى» ٶتكەن اپتادا سىرت ايدىنداردا ەكٸ ويىن ٶتكٸزدٸ. ساراتوۆتا «كريستالدى» 8:1 ەسەبٸمەن ۇتقانىن حابارلاعانبىز. ال 5-قازاندا پەنزادا «ديزەلدٸڭ» قابىلداۋىندا بولدى. مۇنىڭ الدىنداعى كەزدەسۋٸندە پەنزالىقتار 2:1 ەسەبٸمەن «سارىارقانى» ۇتقان. جانكٷيەرلەردە «تورپەدو» دا جەڭٸلٸپ قالماس پا ەكەن دەگەن كٷدٸك بولعانى راس. ەسەپتٸ الدىمەن ايدىن يەلەرٸ اشتى. بٸراق بٸرٸنشٸ كەزەڭنٸڭ سوڭىنا تامان الەكساندر شين ەسەپتٸ تەڭەستٸردٸ. ەكٸنشٸ كەزەڭدە ۆلاديمير كوروتكوۆ مەيمانداردى العا شىعاردى. ەسەپتٸ تەڭەستٸرۋگە تىرىسقان «ديزەل» كومانداسىنىڭ جاتتىقتىرۋشىلارى ويىننىڭ سوڭعى مينۋتتارىندە قاقپاشىنى التىنشى ويىنشىعا الماستىردى. الايدا, ودان ەشتەڭە شىقپادى. بوس قاقپاعا ماكسيم يۋشكوۆ ٷشٸنشٸ گول سوقتى. 

كەشەگٸ كٷنگە «تورپەدو» 34 ۇپايمەن تۋرنير كەستەسٸنٸڭ 8-ورنىندا تۇر. ال سوڭعى كەزدەسۋٸن ساراتوۆتا ٶتكٸزگەن «سارىارقا» (قاراعاندى) «كريستالدى» 5:0 ەسەبٸمەن ۇتىپ, جارىس كٶشٸن باستاپ كەلەدٸ. 

الداعى تٶرت كەزدەسۋٸن «تورپەدو» ٶز ايدىنىندا ٶتكٸزەدٸ. 10-قاراشادا ٶسكەمەندٸكتەر كازاننىڭ «بارسىن» قابىلدايدى.

ج.ەبەنوۆ